﻿Ezayi.
38.
Naama ziɛgi zu Ezekiase zeeɓɛni, é ɠɛnina zaazu. Amɔse ná-doun zunui Ezayi, GALA goo wo nui liini pɔ bɛ, é ɠɛ ma: «Ɠɔoɠɔ GALAGI wooi ɠaa: ‹Ɗa-vaiti gaaɠula ba, é devei yɛ ɗa-ʋɛlɛyeɠei ya, tɔɔzei ɗa ga za, è la ɠulazu seeɓɛi nii zu.› » 
Ezekiase ɠaaʋoteni pɛlɛi ma, é Ɠɔoɠɔ GALAGI maanɛɛnɛni ɠani: 
«Ee, Ɠɔoɠɔ GALAGI, soma è ɠizɛ su ga sìɛʋɛ è ɠaazu ga wooɠɛɠiladai ta ɠi pagɔlai, gè naa ɠɛ nii pagai è ɠaazu.» Naa ʋoluma Ezekiase wɔlɔni, gaazuɗɛi ʋu ga gola. 
Naazu Ɠɔoɠɔ GALAGI ɓɔɛni Ezayi ʋɔ, 
ga é li, é ɠɛ Ezekiase ma: «Ɠɔoɠɔ GALAGI, è-mɛmɛwola Davide ná-GALAGI wooi ɠaa: ‹Gè ɗa-maanɛɛnɛ wooi mɛniga, gè è-ɠaazuɗɛi ɠaa. Deɠɛmu gè kona puugɔ maazu lɔɔlugɔ (15) ʋiliga è-zii zu. 
Ɗa-o, taai nii-yo, nà wo unmɔɔsu, gè wo ɠula Asiili masagi ya, nà taai nii makɛ.› 
Wɛlɛ Ɠɔoɠɔ GALAGI ná-poogi ʋa è ʋɛ, é dɛɛ ga wooi nii é bogai, toɠa daazeeli: 
‹Nu lɛɛzuʋɛ Aɠaze ná-kɔɠɔ losuʋɛ wu, foloi zeɠeni niina ná, niinigi ʋɛɛ naa ma.› » Ɠɔoɠɔ GALAGI niinigi ɠulani ʋolu ga kɔɠɔ losu puugɔ, é zeɠe nu ɠɔɠɔ losuʋɛti, foloi ɗa loo naa ma ʋolu. 
Zuda masagi Ezekiase ɠɛdɛgai ma, é ɠula ná-seeɓɛi zu, é ɠima ɓɔɛi nii zɛʋɛni. 
«Gè ɠɛni ɠɛɛzu ma: ‹Gè sìi ma ɠaaɠwɛ saamai nɔ ɠɛa, kɛlɛ kɛni gè li! Kɛni gè leʋe ga gɔvɛiti ta-laazu ʋele, gè ʋalaga nà-eteai ma ɠonagi mɔtaiti ma.› 
Gè ɠɛni ɠɛɛzu ma: ‹Gè la mɔ Ɠɔoɠɔ GALAGI ɠaa, Ɠɔoɠɔ GALAGI, fulu nuiti ta-eteai zu, anɛɛ nu vulu ɠila kpalaa, etea nuiti saama. 
Zɛ̀nvui ɠulaa zèa, é li maaɠooza bà, eɠɛ baala makɛ nui ná-seɠe ɠotai. Zɛ̀nvui ma ɠezei ɠa ɓilisu, eɠɛʋelei geze vɛlɛ nui a ɗa kɛɛ la ga ná-seɠe vɛlɛai, kpega ʋoluma ga ma ɠeze ɠaluiti teʋeleʋe. Aisa kpɔkɔi ʋa é zeeli, Màliɠii, è ɓega ga nà-fai ɠaaɓela! 
Gè ɓɔɠɔ zoni eyɛsu sobui. Maliɠii mà ɠaeiti golowoloni, eɠɛʋelei zalai a ɗa kɛɛ la. Aisa kpɔkɔi ʋa é zeeli, Màliɠii, è ɓega ga nà-fai ɠaaɓela! 
Gè ɠɛni kpee goiti toozu eɠɛ sɛʋɛzɛʋɛgoi, gè ɗa ɓala eɠɛ poopogi. Gàazuʋɛ zuɓɔlɔ ga gɔlɛi geezuʋɛ. Ee, Maliɠii, nà kidaaʋiligi zu. Ʋa è ɓɔ bà!› 
Leeni ɠa nà bo? Maliɠii ɓɔɛni pɔ̀, tɔ ɓɔɠɔi é ti pɛ kɛa. Nà yɛ ziɛzu ɓɔɠɔmaayeii zu, sìi ma voloiti pɛ su, nà-ziizoolɛ vai maaʋele ma. 
Maliɠii, è-laawooi zaɓui zu ɠa nu ɠa yɛnvu la è ɠoozunɛ, saɓu zu ɠa gè zɛnvui wosu da ʋolu. Ɗa pù su ʋolu, è zɛ̀nvui ve zèa mɔnɔ. 
Nà-kidaaʋili golai valiboga ga ziilɛigi, mazɔlɔɔ ɗa-nɛɛbɛi zu, è kùla saai ya, è nà-faaɠaazagiti piliga ya è ʋoluʋelei. 
Gɔvɛalaazu laade a è maamusɛ, saai laade a è maamusɛ, zɔiti ti laani kabai zu, naati ki ge la mɔ looni ɗa-wooɠɛɠiladai ʋa. 
Fulu nuiti nɔ ɠa ta zoo è maamusɛzu, eɠɛʋelei nɔ̀un gè la za. Ɠɛɛɠɛi ɠa a ná-dointi kala ga ɗa-wooɠɛɠiladai. 
Ɠɔoɠɔ GALAGI kìzoni! Gá è maamusɛ ga gɛingɛin ganigiti gi-zii ma voloiti pɛ su ɗa-ʋɛlɛi wu, Ɠɔoɠɔ GALAGI.» 
Ezayi devei woni ga: «Ti ʋa ga kooleɠoolegi ɠaawaai ɠaayɔgai, ti siɛ wologi ɠa, masagi ɠa ʋalo.» 
Ezekiase ɠɛni ma: «Poogi ɓɛgele ɠa nà kwɛɛ da ga nà zoo gè li Ɠɔoɠɔ GALAGI zei ʋɛlɛi ma ɠoizuʋɛ?» 
