﻿Ezayi.
37.
Masagi Ezekiase naama wooi mɛnigai ma, é ná-seɠeiti baliʋalini ga ga kidaaʋiligi maaʋele, é saa wɔlɔ wo seɠei loo ɠɔba, é li Ɠɔoɠɔ GALAGI zei ʋɛlɛi ma ɠoizuʋɛ. 
É Eliakime leʋeni, nii é ɠɛni ga masagi ná-pɛlɛi wu ɠundiɠii, ta sɛʋɛ ɠɛ nui Seɓena, naa ʋɛɛ zalaɠa ɠula nu wɔlɔiti ba, saa wɔlɔ wo seɠei ti ɠɔba, ti li GALA goo wo nui Ezayi ʋɔ bɛ, Amɔse ná-doun zunui. 
Ti ɠɛ ma: «Ezekiase wooi ɠaa: ‹Za voloi ɠa ga ziiɓɔlɔ volo, ta maaɠolo volo, ta unfe ku. Mazɔlɔɔ gi ɠɛa eɠɛ koma anzanui, doin zɔlɔɔ fai maaɓuɠaai na ba, kɛlɛ zɛbɛ nɔpɛ ge la mɔ ná, é ʋa sɔlɔɔ. 
Asiili masagi ná-kɔɔlaaɠai ma ɓɔba nui leʋegɛ ga é zɛnvu su ƓALAGI ʋoomu. Ee, é ga ɗa-ƓALAGI, Ɠɔoɠɔ GALAGI ɠɛni poomugi naati mɛnisu, é doɠa, tɔɔzei kpɔɛ ʋelei nuuti ba. Ɗɔun, ɠaaɓa, è Ɠɔoɠɔ GALAGI maanɛɛnɛ ná-nuɓusɛi mɔtai niiti bɛ.› » 
Masagi Ezekiase ná-keelaiti ti zeelini Ezayi ʋɔ bɛ. 
Naa ɠɛni ti ma: «À li, wo ɠɛ wo-maliɠii ma: ‹Ɠɔoɠɔ GALAGI wooi ɠaa: Wooi nuuti Asiili masagi ná-botiɠɛ nuiti ti pòomugai ga tiye, naa mina è maalua. 
Masagi ɠa wooi ta mɛni, gè pu ziimaʋɛ ga é ɠale ma ná-zooi zu. Miná ɠa nà va bu ga ti paa ná ga boɠa zɔkpɔi.› » 
Asiili ɠɔɔlaaɠai ná-kpɔba nui ɠaleni ma, mazɔlɔɔ é mɛnini ga ná-masagi zeɠeʋɛ Lakise, é li, é Liɓina zei kɛlɛ su. Miná ɠa é kaani ná. 
Su la ɠoozani Asiili masagi keela woo zɔlɔɔ ga Etiyopi masagi Tilaka ʋilɛgɛ pele ma tɔun daalɔɠɔma. É keelaiti teʋeni ʋolu Ezekiase ma, é ɠɛ ma: 
«À ɠɛ Zuda masagi Ezekiase ma: ‹Mina va bu ɗa-ƓALAGI ʋa è yaava, nii è ɠalivaai ma, ni a ɠɛɛna è ma, Zeluzalɛme la lɔa Asiili masagi yeezu. 
Ɗa ɓɔɠɔgoi è mɛnini ʋelei Asiili masagiti ti zooiti kpein sogai la, ti ti kpein koloɠoloni nɔ. Ɗa kaazu ga ɗa ɠila ka naa ɠa ʋoola è ʋa? 
Mɛ̀mɛwolani ti taa wolai niiti koloɠoloni: Gozan, Ɠalan, ta Lesɛfe, ti Edɛn mavofodaiti suwuɠaaleʋe niiti ti ɠɛni Telasaal. Naama yooiti ta-ɠalagiti ti ti unmɔɔni ɓaa? 
Mini ɠa Ɠamate masagi ná, ta Aalapade masagi, ta Layile masagi, ta Sefaalavayime masagi, naa ʋɛɛ Ɠena ta Iva geleiti ba?› » 
Ezekiase sɛʋɛi ɠulani keelaiti zea, é kala. Naa ʋoluma é lɛɛni la Ɠɔoɠɔ GALAGI zei ʋɛlɛi ma ɠoizuʋɛ, é suvie Ɠɔoɠɔ GALAGI ɠaazu, 
é maanɛɛnɛ, é ɠɛ ma: 
«Ee, Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI, ɗɛi è zeini seeluɓɛinti unda, ɗa ɠa è ga GALA gila kpegi eteai zu masadaiti pɛ bɛ, ɗa ɠa è geeɠɔlɔgi ɓɛtɛa ta zooi. 
Ee, Ɠɔoɠɔ GALAGI, woilo ga pagɔ, ɠaazuzeɠe ma, è wɛlɛ! Sɛnakeliɓe wooi mɛni, nii é ná-kɔɔlaaɠai ma ɓɔba nui leʋegai ga zɛnvu su ƓALAGI ʋoomu ga tiye. 
Ee, Ɠɔoɠɔ GALAGI, gaamai ʋe, Asiili masagiti ti ziiti pɛ ta ta-yooiti koloɠologɛ. 
Ti naati ta-ɠalagiti pili abui zu, ti ɠala, tɔɔzei naati ti la ɠɛni ga gala kitea, ti ɠɛni nɔ ga nuɓusɛiti ta-ɲɛɛliɠi wotiiti, gului ta kɔtui, tama ti ti ɠoloɠologɛ. 
Naa ɠa é ba, ee, Ɠɔoɠɔ GALAGI, gá-ƓALAGI, gi ɠizo, è gi ɠula Sɛnakeliɓe ya, nii a kɛ eteai zu masadaiti pɛ ti kwɛɛ ga ɗa ɠila kpe ka è ga Ɠɔoɠɔ GALAGI.» 
Názu ɠa Amɔse ná-doun zunui Ezayi niima ɠeela wooi leʋeni la Ezekiase ma, é ɠɛ ma: «Ɠɔoɠɔ GALAGI, Izilayɛle ná-GALAGI wooi ɠaa, nii è maanɛɛnɛai é ʋilɛ Asiili masagi Sɛnakeliɓe ʋa, 
Ɠɔoɠɔ GALAGI wooi ɠaa daalɔɠɔma: ‹Siyɔn anzalopoi è ʋɛlɛʋiliga, é ɗa ɲɛɛɠula è zu. Zeluzalɛme anzalopoi ɠa è ɲɛɛzu, é ɗa ungi ɲiikpi ga ɗe. 
« ‹Ɓɛ ɠa è poomugai, è suvɛ? Ɓɛ ɠa è daaɠugi ɠulazu la ga woo wola, è wɛlɛ ba ga bɛlɛlalai? Nà ʋe de, Izilayɛle ná-GALA Ɲadegai! 
È pòomugɛ, nɛ̀i gè ga Maliɠii, ga ɗa-wotiɠɛ nuiti maaʋele, è ɠɛ ma: Nà-kɔɔɠɔ wotolo mɔinmɔingiti saala zu, gè lɛɛni gizeiti unmaʋɛ, gè lɔ Liɓan ɠizei zaamaʋɛ, gè sɛdele gulu ɠoozagiti teʋe, naa ʋɛɛ sipɛlɛ gulu ʋapagiti ba, gè zeeli ma unsu ɠaaɓelagi ma, ná-goya wolai unga munu. 
Gè ziɛyeɠei wɔɔʋɛ, gè su ɗɛi ɓɔle. Gè ziɛ wolai Nile ma ɓekegiti pɛ fɔɔni ga kɔ̀ɠɔiti Ezipete yooi zu ná pɛ. 
« ‹Kɛlɛ ɗɔun è la suɠwɛɛni ga kaite gè niima vaiti deveʋɛ, ta kaite wɔlɔwɔlɔ gè seiʋɛ kpasu? Niizu niina, nà ga naa laazeeli, nii gè deveai. Naa ɠa é kɛa gè ʋaa ga ɗe, nii a kɛ è taa wolaiti golo niiti siɠigi ti ma, ti ɠɛ nɔ ga kɔtu ziɠigiti. 
Zɛbɛ nɔpɛ ge la ti zu nuɓusɛiti ba, ta luazu, unfegi yeiɗai ga tiye, ti ɠɛɛʋɛ eɠɛ dɔɓɔzu lufai, eɠɛ tufa lɛnugi, eɠɛ pɛlɛ ɠɔma lufa ʋɔnɔgi, é vɔɔzu aisa ma ɓakui ʋa lo ba. 
Kɛlɛ gè ɗa-vaiti pɛ kwɛɛ, siɛgi zu è zeini la, gè kwɛɛ siɛgi è ɠulazu la, ɓaa è lɛɛzu la ɗa-ʋɛlɛi wu, ta siɛgi zu è wuzeɠezu la dàalɔɠɔma. 
Tɛi è wuzeɠea dàalɔɠɔma, ɗa-ɓɔɛ yaɠasagiti ti lɔa gòizu, nà nà-balaɠaegi ʋilisu è-zokpai ʋa, gè è-lakɔlɔgiti pilisu ga nà-kalafei, gè è ɠaaɠale ma ga pelei nii è ʋaai la. 
« ‹Ɗɔun, ɗa ma, Ezekiase, nii ɠa é ɠɛɛzu è ʋɛ ga poogi: Ɲɔmɔ ɠonagi molo ɠaei nii pɔnɔgai ɓɔɠɔ ʋɛ, naa ɠa é ɠɛɛzu ga wo-ɠɔnɔgi, yɔɠɔnázu ɓalaa ʋele nɔ ɠana é ɠɛɛzu la. Kɛlɛ konagi zaʋasiɛi, à tii ɠɛ, wo teʋe, wo leezɛn ɓeleiti sin, wo ti-ɠaawaai mi. 
Zuda nui niiti ta yɛ vulua, naati ta ɠɛ eɠɛ gulu ʋɔnɔgi, nii é zapei niinɛiti dɔɔzu, ta é waazu ga pagɔ. 
Ungo, nui mɔta go ɠa yɛ vulua Zeluzalɛme, kɔɔ ʋoolabaiti ta ɠɛ Siyɔn gizeiti ma. Naa ɠa Ɠɔoɠɔ GALAGI, Fai-Pɛ-Maliɠii ʋaazu kɛɛzu tɔɔzei ná-nɛɛbɛ wolai ʋa.› 
«Naa ɠa é ba, Ɠɔoɠɔ GALAGI wooi ɠaa é ʋilɛ Asiili masagi ʋa: ‹É la lɛa taa wolai nii zu pɛ, é la mɛɛn nɔpɛ piliga daalɔɠɔma, é la maaɓuɠaa ba ga ná-kɔɔɠɔ zɛpɛgiti maaʋele, é la pɔlɔ ziɠi toga daalɔɠɔma. 
Pelei é ʋaani la, toɠa ɠale ma ga naa nɔ, é la lɛa taai tɛi su,› » Ɠɔoɠɔ GALAGI wooi ɠana. 
« ‹Nà ɓaazu taai nii maazu, gè kizo, nà ɓɔɠɔi maaʋele ma, ta nà-botiɠɛ nui Davide maaʋele ma.› » 
Ɠɔoɠɔ GALAGI ná-geezuɠeelai ɠulani, é nu waaungila waaʋuulɔsaʋa maazu lɔɔlugɔ (185.000) ʋaa Asiili ɠɔɔlaaɠai zu. Poluma zobui, ti wuungai ma, ti kɔɔlaaɠai zulaavegai ɠaani ga poomaiti. 
Názu ɠa, Asiili masagi Sɛnakeliɓe kɔɔlaaɠai zeɠeni ná la, é li, é ɠale ma Ninive, é yɛ ná. 
Yeeta, é yɛni nɔkɔsu ná-galagi Nisilɔke ná-pɛlɛi wu, ná-doun zunuiti Adalamelɛke ta Salɛsɛɛl ti paa ga boɠa zɔkpɔi, naa ʋoluma ti ʋela, ti li Alalate yooi zu. Ná-doun zunui zɔi, daa ɠɛni ga Ezaal-Ɠadon, naa ɠa é zeini potogi zu masa kpɔkpɔgi ɠa. 
