﻿Ezayi.
35.
Teʋebai ta zou vɔɔi ti ta-ɠoozunɛɛi ɠulaa kɛlɛma! Zou vɔɔ ɠoozunɛ, maaɓidi ga tufa waaiti. 
Tufaiti ma waa ʋagɔiti ti mɔin ná, ná-koozunɛɛi zuwɔɔlɔ, é pilɛ sɔlɔɔ guyei loo ga koozunɛɛi! Liɓan ɠizei ma lɛbiyai veeʋɛ zea, ta Kaalamɛle gizei ná-maayikii, Salon ɠizei nɔnɔi. Naazu ta Ɠɔoɠɔ GALAGI ná-lɛbiyai ɠa, ada-ƓALAGI ná-maayikii. 
Wo-yeeiti ti zuɓɔlɔai, à ti zulo, wo-ɲiibiiti ti ɓalizu, à ti lo kpe. 
À ɠɛ naati ma ti ziiɓɔlɔi zu: «À yiilɔɔ, dualua ge mina wo zo, wa-ƓALAGI ɠana ʋaa, potokulai ɠa é ʋaazu la, nii é ga GALA ɓɔɠɔi ná-sala veei, tɔ ɓɔɠɔi ɠa é ʋaazu, é wo ɠizo.» 
Naazu, gaazuɠole nuiti gaazu ɠa zeɠe ma, ti wozaɠa, goizuɓɔlɔ nuiti goizuʋɛti daa ɠa lao, ti ɗa faa mɛni. 
Naazu, mɛɠɛlɛ nuiti ta ɗa ʋili eɠɛ dopai, ɓoɓoiti ti ɗa ɓɔɛ ga koozunɛɛi. Mazɔlɔɔ ziɛiti ta ɠɛ yeizu teʋebai zu, kɔtuɗɛiti ti ɗa yei zou vɔɔi zu. 
Zou vɔɔi ɠa valibo ga ziɛ ɓoigi, zooi ziɛ vai ɓaai su, miná ɠɛ ga ziɛungiti. Zeɠei koʋeiti ti ɠɛni ʋɛɛzu su, seeligiti ta tɛmuiti ta ʋɔnɔ miná. 
Pelei ɠa la ná, ta daasei pɛɛ ga pele ɲadegai. Kɔzɔba nu nɔpɛ ge la zooga é ʋa ziɛ la, mazɔlɔɔ makɛgɛ GALA ná-nuɓusɛiti gila kpe nɔ ʋɛ ga ti ziɛ la, anɛɛ ɠimalala nuiti ti la ɠakaga su. 
Zala la ɠɛa pelei ná zu, sua ɲɔu ɠila kpalaa ge la ziaa la, nu la taɠila kpalaa ka ná. Maliɠii ná-nu ɠizogaiti nɔ ɠa ta ɠɛ ziɛzu ná. 
Zekana é la, zɔiti Ɠɔoɠɔ GALAGI ti unmɔɔgai, ta ɠale ma, ta zeeli Siyɔn ga pilɛ sɔlɔɔ guyeiti. Ɠɔoɠɔ koozunɛɛi ɠa ti-ɠaazuʋɛti folo, ta undaanɛɛi ta koozunɛɛi zɔlɔɔ, ziiɓɔlɔi ta gaazuɠili vaiti maa ɠa ɠooza ti ʋa. 
