﻿Ezayi.
32.
Masa gila ka wuzeɠe, nii a masadai ɠɛ ga telebodai, ná-kundiɠiiti ta zei nuiti unda ga sɔledai. 
Ti ɠilagilagi ta ɠɛ eɠɛ ʋɛ nu a lɔɔɠu ná fiilɛi ʋa, ʋɛ nu a lɔɔɠu ná tona viilɛi ʋa, ti ɠɛ eɠɛ ziɛi é laani zou vɔɔi zu, ɓaa eɠɛ fasa wola ma niinigi teʋebai zu, suvɔai. 
Naazu zɔiti ti-ɠaazuʋɛ maanɛɛni é wozaɠaa, naati ti la mɔ ɠɛa ga gaazuɠole nu, faa mɛni nuiti goi ɠa mɛnigi wo. 
Kidafaawulala nuiti ta faa ɠaaɠa, muuma nuiti ta zoo ɓɔɛzu valafala ga pagɔ. 
Ɠimalala nui la mɔ zooga é ʋa leve ga seizumaanɛ kɛʋele, nu la mɔ ɠɛa yaava nui ma, toɠa ga nu wola. 
Ɠimalala nui ɠa ɗa ɠimalala vai nɔ wo. Toɠa ɗa ɓɔɠɔ ve faa ɲɔu ɠɛɛ vai ya, é la unfe ga GALA ma kɛɛ vai tanɔpɛ su. Toɠa ɗa woo ɲɔiti bo Ɠɔoɠɔ GALAGI ma. Zɔi pului ma, é naa ɠoozu ɲakai yɛ, zɔi é zaazu ga kpɔɔle wɔin, é naa yɛ ziɛ ʋalagi zu. 
Yaava nui ná-kɔɔɠɔ zɔɔlaiti ɲɔuʋɛ. Toɠa ɗa kisiɛ ɲɔiti kpɛtɛ, é ʋa maanɔɠɔ nui undaaʋili ga zɛɛ ɓɔɛiti, anɛɛ ni maanɔɠɔ nui ɠa ná-gaamai zu. 
Kɛlɛ nui zii ʋagai, naa ɠa ɗa kisiɛ ʋagɔiti kpɛtɛ, siɛ ʋelei pɛ ka ɗa ná-nuʋagɔlai lɛ. 
Ee, anzanuiti, wɔiti ziizoolɛ la wo ma, à wuzeɠe, wo woilo gòoi ma! Anzalopoiti wɔi maaɠili la wo ma, à woilo gòoi ma! 
Kona gila ta tago laawu, wa ʋaazu ɓalizu, wɔiti maaɠili la wo ma, mazɔlɔɔ dɔɔɓɔi kpɛtɛ vaa la mɔ ɠɛa, ma waa ɠula vaa la mɔ ɠɛa ná. 
À ɓali ga duai, ziizoolɛlala nuiti, à ɓali, wɔiti maaɠili la wo ma. À ɠula wa-zeɠeiti su, à seɠei ɠula ɠɔba, wo zaamaɠili ga saa wɔlɔ wo seɠei. 
À yiila loɠa, wo wɔlɔ ɓalaɠa ʋapagiti faa zu, ta leezɛn ɓeleiti ti ɠɛni gwaai wosu gola. 
Wo wɔlɔ nà-nuɓusɛiti ta-yooi vaa zu, nii ɠaingiti maaɓɔlegai, pɛlɛyeɠeiti koozunɛɛi ɠɛni ti wu taazuʋɛ, é naati pɛ maaɓɔlega. 
Mazɔlɔɔ masa pɛlɛi zuwoga, taai daaveni suwoga, gizei ta pɛlɛ ɠaaɠoozagi ti ɠɛ ga pugi eyɛsu ɠɔ, ʋɛ dɔɓɔzu zoovalegiti ta ɠɛ ʋɛɛzu ná, ta togani laamiizuʋɛ. 
Toɠa ɠɛ ɠana, eyɛsu Zɛnvui yei ade ma, é zeɠe geezuʋɛ, názu teʋebai zu ɠa valibo ga gulu ɓelei, gulu ɓelei ɠa yɛ ɓɛtɛzu, é ɠula ga goya lɔɓɔi. 
Sɔledai ɠa ɠɛ teʋebai zu, telebodai zei gulu ɓelei zu. 
Telebodai ma lɔnɔgi ɠa ɠɛ ga ziilɛigi, telebodai ɠɛɛwotii ɠa ga kulagaanɛɛzui ta ziilɛigi eyɛsu ɠɔ. 
Nà-nuɓusɛiti ta ta-eteai ziɛ ziilɛigi zu, seizu ʋagɔi zu, ziilɛi pɛlɛiti bu. 
Sakɔtui ɠa dɔɓɔi loo bu, taai ɠa loo bu. 
Kɛlɛ wa ɠɛ ga undaanɛ nuiti, wa ani zuwui vaza ziɛlaʋɛti, wo zoo wo nikɛiti ta soovalegiti pilɛ ɓɔɠɔ yeema. 
