﻿Ezayi.
27.
Naama volo ná, Ɠɔoɠɔ GALAGI ɠa potokulai wo ga ná-boɠa zɔkpɔ wolai, maayikiai, boɠa zɔkpɔi buwuiɗai, é laalɛ ziɛ wu zua maayikiai wu suɓiligai, vamɔɠɔgi naa é la ɗa ga zoga, toɠa kpoloɗɛi wu vamɔɠɔgi naa ʋaa. 
Naama volo ná, ta ɠɛ ma: «À leezɛn ɓelei maawuye, gwaa ʋagɔiti ti ga. 
Nà, Ɠɔoɠɔ GALAGI, nà ɠa gè makɛsu, nà kɔɔzu yeenɔpɛ. Nà makɛsu folo ʋɛɛ kpidi ʋa, naa ɠa a kɛ nu mina lɔ su. 
Ziiɠaawana la mɔ zìimaʋɛ, kɛlɛ nà kpolo ɠaingiti kaana, ta ɠaingiti, nà laalɛ ti wu, gè abui lo ti ʋa. 
Kɛni ni ta kɛ̀ɛna ga ti-lɔɔɠuzuʋɛ, ti gi yɔɠɔzuɓɛtɛ, ziilɛigi ɠa ná, ungo, ziilɛigi ɠɛ gi yɔɠɔzu.» 
Yeeɠɛɠalaiti su ti ʋaazu, Zakɔɓe ná-nuɓusɛiti ma zape niinɛiti ta ɠula, Izilayɛle ɠa ʋua, é vuka, é eteai pɛ maaɓɔle ga gaawaaiti. 
Ɠɔoɠɔ GALAGI ná-nuiti doɠaʋɛ nɛi, eɠɛʋelei é naati doɠa, nuiti ti ɠɛni ti loɠazu la? Ɓaa é ti ʋaaʋɛ nɛi, eɠɛʋelei é kɛɛni la ga naati, niiti ti ɠɛni ti ʋaazu? 
É ta-lukpɔi ɠaaleʋe ga, é ti ɓɛ, é ti laaʋili. É ti zeɠeni ná ga daa viilɛ ɲɔi, ga folo ɠila fiilɛi, é zeɠe folo ɠulazu ʋelei. 
Naama loɠai maaʋele ma, Izilayɛle ná-faaɠaaza golaiti ta gba. Wɛlɛ ná-kotoi zuvaayɛ fai ma lɔnɔgi ɠa ɠɛ ga: Zalaɠa ɠulazuʋɛ ma ɠɔtuiti ta ɓulukpulu su eɠɛ kobegi ma ɠɔtuiti, ti ɠɛ ga fufiligi, sale wuluiti ta ansanse gala aniɲakaiti ti la mɔ ɠɛa ná pɛ. 
Nu nɔpɛ ge la mɔ taa wolai zu siɠigi ma, toɠa ná, suɲakai, ti ɠɛlɛni ba, é ɠɛ ga teʋebai. Nikɛ yiʋoiti ti ɗa laami ná, ti ɗa ʋɛɛ ná, ti ɗa daaiti mi dɔɓɔɠɛlɛ koiti su. 
Siɛgi zu ma ɓekegiti ti vɔɔzu la, ta ti ɠaleɠale, anzanuiti ti ʋa, ti ti zeɠe, ti ti ɠala. Mazɔlɔɔ nuɓusɛa ʋe ti la faa ɠaaɠaazu, naa ɠa é ba, zɔi é ti ɓɛtɛa, é la ti maawɔinɠaa, zɔi é ti ɓɛtɛni, é la zaala laani ti ma. 
Naama volo ná, Ɠɔoɠɔ GALAGI ɠa ná-moloi loɠa, é zo ziɛ wolai Efelate ma, é zeeli Ezipete ɠɔtuɗɛi ma. Izilayɛle nuiti, toɠa wo yɛʋɛ ga gilagila. 
Naama volo ná, puʋu golai ɠa vɛ, niiti ti undaa ɠɛa ʋilisu Asiili yooi zu, ta niiti ti fazani Ezipete yooi zu, ta ʋa, ti nɔkɔ Ɠɔoɠɔ GALAGI wu gize ɲadegai ma Zeluzalɛme taazuʋɛ. 
