﻿Ezayi.
23.
Keela wooi é wosu é lo Tiil ʋa. À kpalagi wona, Taalasise ɓato wolaiti! Mazɔlɔɔ ʋɛ wo ɠɛni losu ná, naa ɠoloɠologa. Pɛlɛiti ti woloa! Nu lɛɛzu la mɔ ná! Ti ma wooi mɛnini, ti ʋaai ma, ti zeɠe ziɛ zaama yooi ma laai zu daa ga Sipele. 
À yɛ daavɔyai zu, kpoloɗɛi laaʋɛ yooi ma zei wo nuiti, nii Sidɔn yaaɠoiti ti ɠɛni sulaavesu, ti ɗa ɓizɛ kpoloɗɛi ɠa. 
Ziɛ wolai ɠaaʋɛ, niiti ti wolizu ziɛ wolai ɠobaʋɛ, ziɛ wolai Nile ɠobaʋɛ ma molo leʋei ɠɛni bɛ ga tɔnɔgi, naa ɠɛni ga zii ɠiligiti pɛ ta lɔɔɠɔi zu. 
Ɠɛ unfegi zu, Sidɔn! Mazɔlɔɔ kpoloɗɛi ɓɔɛni, kpoloɗɛi ma lɔɔɠu wosuʋɛ ɠɛni ma: «Gè la taɓa zɔlɔɔni, gè la ɠɛni doun zɔlɔɔni, gè la doun zunua ɠulani su, gè la doun anzanua ɠulani su.» 
Siɛgi zu ma wooi zeelizu la Ezipete yooi zu, toɠa wana ti ma gola, eɠɛ nɔ siɛgi zu ti naa mɛnisu da nii seeliai Tiil taa wolai ma. 
À kpoloɗɛi ɓudɛ, wo li Taalasise, wo kpalagi wo, wɔi wo zeini ziɛlaʋɛ. 
Wa-laa wolai ɠa nɛi ɓaa, ʋɛ ná ɠaanɛɛni mɔungi, nii ná-faiti tɔɔzeiɗai wɔlɔwɔlɔ voloiti su, taai nii é liini ɠoozamaʋɛti seikɔɠɔmai ma? 
Ɓɛ ɠa deɠɛmu é niima vaiti pɛ deveai Tiil taa wolai laalɔɠɔma? Tiil é masa bɔɔlɔgiti gaaɠwɛɛzu, ná-yaaɠoiti ka ti ɠɛni ga nu wolaiti, tiya la ɠɛni de unfemai ʋa ɠɛni ti ʋɛ eteai zu ná pɛ ɓaa? 
Ɠɔoɠɔ GALAGI, Fai-Pɛ-Maliɠii ɠa é niima levei wogai, é wasogi ɠula ɓɔɠɔ lɛbiya ɠaiziɛ nuiti ba, é naati gaayei, niiti eteai unfemai veezu ti ʋɛ. 
À li, Taalasise nuɓusɛiti, wo tii ɠɛ wa-yooi ʋa, eɠɛʋelei Ezipete nuiti ti kɛɛzu la ziɛ wolai Nile ɠobaʋɛ. Ɓato losu la mɔ wo ʋɛ. 
Mazɔlɔɔ Ɠɔoɠɔ GALAGI yeewuzeɠea kpoloɗɛi laalɔɠɔma, é masadaiti suɓalia. É devei vea ga Kanaan yooi zu lɔɔɠuzuʋɛti pɛ ti wolo. 
É ɠɛni ma: «Sidɔn nuɓusɛi, ɗɛi è ɠɛai eɠɛ anzanu loungoi ti koloɠologai, looɠona koozunɛɛi ʋa! Wuzeɠe, è ʋilɛ pelei zu, li, è zei Sipele, ziɛ zaama yooi ma laai zu, kɛlɛ anɛɛ miná ʋe, dooɠo nɔpɛ ge la ɠɛa ná è ʋɛ.» 
Wɛlɛ Ɓaɓilɔne nui ta-yooi ʋa, naama nuɓusɛiti ti la mɔ ná. Asiili yooi naa ɠɛa ga teʋebai zu zuaiti seizu, ti pɛlɛ ɠaaɠoozagiti to, ga ti taai zei kɛlɛ su, ti masa pɛlɛiti kpalega ná, ti ti pɛ koloɠolo. 
À kpalagi wona, Taalasise ɓato wolaiti! Mazɔlɔɔ wo-lɔɔɠuzuʋɛ ɠoloɠologɛ! 
Naama volo ná, zeemai ɠa wo Tiil ma kona ʋuulɔfela (70) laawu, masa gilagi zii ma voloi liegɔi ɠana. Naama ɠona ʋuulɔfelai (70) laawu, naa ɠa ɠɛ ga Tiil, nii guyei bosu é lo koloɠolo anzanui ʋa ga: 
«Li, è ɗa-ɠɔnigi zeɠe, è lati taai ma, koloɠolo anzanui zeemai wogai ma! Gɛin gola, guyei loo, guyei loo ʋolu, ga è nuiti kigi loo ɓɔɠɔ zu!» 
Kona ʋuulɔfelai (70) a leʋena, Ɠɔoɠɔ GALAGI ɠa Tiil maalobo. Názu ɠa Tiil a ɠaaʋote da ná-naavolo zɔlɔɔgi ma, é ɗa koloɠologi ɠɛ la ta masadaiti kpein, ti eteai zu ná pɛ. 
Kɛlɛ ná-tɔnɔgi ta ná-kulanumai, naati ta ve Ɠɔoɠɔ GALAGI ʋɛ, ti ɠaa la lɛa ba, ti ʋa makɛ, mazɔlɔɔ tɔnɔgi naati ta ɠɛ ga nui naati tɔnɔ niiti ti Ɠɔoɠɔ GALAGI ɠobaʋɛ, é ɠɛ ga ti-ɠɔnɔgi, ti mi, ti mɔtai yɛ, ti ɓɔɠɔ maaɠili ga seɠe maayikiyikigi naati. 
