﻿Ezayi.
22.
Keela wooi é wosu é lo kulakɛlɛma nɛmɛi ʋa. Leeni ɠa é ɠɛɛzu ga ɗe, Zeluzalɛme? Leeni vaa zu ɗa-nuɓusɛiti pɛ ti lɛɛzu pɛlɛ ɠɔmaʋɛti? 
Zeluzalɛme, leeni vaa zu è ɠɛai ga taa wolai zɔngɔi wola su, kpeei sulaavegai, taa wolai nii fɛtii ɠulazu su? Ɗa-nu ʋoomaiti ti la zaani ga boɠa zɔkpɔ, ti la zaani kɔɔmaʋɛ. 
Ɗa-ɠɔɔɠɔ ɠundiɠiiti ti ʋelani ʋɔɔma, ti ɠɛɛni ga kasoɠa nuiti mɛɛn ʋili nuiti zea. Niiti kpein ti ɠaani, naati ti ɠɛɛni ga kasoɠa nuiti, anɛɛ zɔiti ti ʋelani, ti li ɠoozama. 
Naa ɠa é ba, gè bo wo ma: «À mina ɓala ga ze, à zɛ̀ ná gè gɔlɔi wo ɠɛzɛɠɛzɛ. À mina ɓala ga gàanɛɛnɛ vai, nimizai vaa zu nà-nuɓusɛiti ti sɔlɔɔgai.» 
Mazɔlɔɔ ziiɓɔlɔ voloi ʋe ta nimizai ta faa zuɠoloɠologi, nii Ɠɔoɠɔ GALAGI, Fai-Pɛ-Maliɠii teʋegai kulakɛlɛma nɛmɛi zu. Siɠigi ɠoloa, kidaaʋili kpeei ɠana loo gizeiti ma. 
Elame zalaʋusuiti ti mɛɛinti ta mɛɛn ɠaeiti seɠea, nuiti ta zeini kɔɔɠɔ wotoloiti su, sooiti ta ná. Kiil zalaʋusuiti ti ta-ɠɔɔɠɔ zɛpɛgiti kpɛtɛa. 
Ee, Zeluzalɛme, ɗa-nɛmɛiti ti ʋagai ti leʋe ti pɛ ba, ti zulaavegɛ ga kɔɔɠɔ wotoloiti, salaʋusuiti ti kɔɔɠɔ wotoloiti su ti ʋa, ti lopele ɓɛtɛ ɗa-laa ziɠidaʋɛti. 
Zuda yooi makɛ ani la mɔ ná. Naama volo ná, wo ɠaazuʋɛ latini, wo to kɔɔɠɔ zɔɔlaiti ba ti ʋuuni pɛlɛi wu daa ga «dɔɓɔzu ʋɛlɛi». 
Wo pɛtɛga zeɠei mɔin ʋele liegɔi é masagi Davide ná-taai ma ziɠigiti ba. Wo ziɛi makɛga, ziɛ ʋu ani zu é buu ʋelei. 
Wo Zeluzalɛme ʋɛlɛiti gaaluni, wo tanigaa woloa, wo ta ɓɔ siɠigi zɛbɛi ʋa la, nii é taai makɛsu. 
Wo ziɛ zosuʋɛ ɓɛtɛni siɠi felegɔiti zɔɠɔzuʋɛ ziɛ makɛsu wɔlɔmai ma ɗɛiti faa ma. Kɛlɛ wo la ɠaazu latini, wo ʋa wɛlɛ naa ʋɔ pelei nii é naati pɛ kɛɛzu, é ti ɓɛtɛni kaite wɔlɔwɔlɔi. 
Naama volo ná, Ɠɔoɠɔ GALAGI, Fai-Pɛ-Maliɠii wo lolini ga wo wɔlɔ, wo ɓɔɠɔ maawɔin, wo wɔungi ɓuye, wo saa wɔlɔ wo seɠei loo. 
Wɛlɛ ziiɠaanɛɛi ʋa ta koozunɛɛi, ti ɗa nikɛiti paa, ti ɗa baalagiti kɔdaaleʋe, ti ɗa suai mi, ti ɗa dɔɔi ɓɔle, ti ɗa ɠɛ ma: «Ade daamii wo, de ɓɔɔle, mazɔlɔɔ da zaazu lina.» 
Ɠɔoɠɔ GALAGI, Fai-Pɛ-Maliɠii keela wooi nii wo mà: «Nà ɠonazu, niima vaaɠaaza golai ɠaa la zooga é ʋa ʋaa, kɛni wa zaana,» Ɠɔoɠɔ GALAGI, Fai-Pɛ-Maliɠii ɠa é boga. 
Ɠɔoɠɔ GALAGI, Fai-Pɛ-Maliɠii wooi ɠaa: «Li, è naavolo makɛ nui Seɓena ʋɛtɛ, masa pɛlɛi ma ɠundiɠii, é ɠɛ ma: 
‹È-ɠɔligi ɠa ga ɓɛgele ʋɛ, ɓaa ɗa-nui ɓɛ ɠɔli ka é ʋɛ, ɗa seɠe ga ɗɔnɔ, è liizu kabayeɠe wɔɔzu ʋɛ, è kabai ɓɛtɛzu maazuʋɛ, ga è zeɠe wɔ fasai ʋa, naa ɠɛ ga è-zeizu ɠaaɓelagi? 
Wɛlɛ, Ɠɔoɠɔ GALAGI ɠa è ʋilisu ya ɠoozama, zeeɲɛ gila nɔ, é è maavelevele, 
toɠa è laaʋili eɠɛ ani ɓuun, è ɗa ɠilikili zooi ma suwɔɔlɔai. Miná ɠa ɗa za ná, miná ɠa ɗa-ɠɔɔɠɔ wotolo maanɛɛnɛgiti ti ná, ɗa ɠa è ɓaaɠulazu ɗa-ɠundiɠii ná-koii ma!› » 
«Nà è ɓɛɛzu è-losuʋɛ,» Ɠɔoɠɔ GALAGI ɠɛ naa, «nà è volosu ɗa-woti ɠɛɛzuʋɛ. 
Naama volo ná, nà nà-botiɠɛ nui loli, Yilikiya ná-doun zunui Eliakime ya. 
Nà maaɠili ga ɗa-zeɠeungi, nà ɓaa maazu ga ɗa-zaamaɠiligi, gè ɗa-zobogi ʋu zeezaama. Toɠa ɠɛ ga ɠɛɛɠɛi Zeluzalɛme nuiti bɛ, ta Zuda yooi ma masadai ʋɛ. 
Nà Davide ná-masadai ma ɓaɠui ve zea, siɛgi zu é daalaosu da, nu nɔpɛ ge la daaɠuluga, ta siɛgi zu a daaɠuluna la, nu nɔpɛ ge la daalaoga. 
Nà topele ɓɛtɛ kpe eɠɛ gulu ɠaazoɓagi pilɛgai ada ʋagɔi, toɠa ɠɛ ga lɛbiya masa kpɔkpɔgi kɛɛɠɛ ʋɛlɛyeɠei ʋɛ. 
«Ná-pɛlɛyeɠei wu nuiti pɛ, niiti ti maaɓuɠaai ta niiti ti maaɠoozaai, ti pɛ ta zɛlɛ ba, eɠɛʋelei aniɲaka goi a ɗa zɛlɛ da ga ɲaka ɠilibai, é zo ɓɔniiti ma, é li ma lakulugiti ma. Kasɔ zɛbɛlɛ gola ɠana! 
Naama volo ná, gulu ɠaazoɓagi kpadɔai ada ʋagɔi, tɔɔ ɠa ɠula,» Ɠɔoɠɔ GALAGI, Fai-Pɛ-Maliɠii wooi ɠana. «Toɠa zeɠe ná, é ɠale ga, é loo, kasɔi kpein é ɠɛni seɠezu, ta ɠoloɠolo.» Mazɔlɔɔ Ɠɔoɠɔ GALAGI ɠa é boni. 
