﻿Ezayi.
18.
Maanɔɠɔ ɠa zooi naa ʋɛ, ʋɛ aniiti koʋe tugi ɠulazu ná, Etiyopi ɗɛ wolai ʋoluʋɛ, 
ɗɛi è keelaiti teʋesu kpoloɗɛi ɠa, ti ga è-ɠaazuʋɛ, ti ɗa ziɛ ziɛiti ga ɓatoi zu kpɛtɛai ga tɛmui! Keelaiti ti zuvilaai, à li ziiti pɔ bɛ, ti ɠoozaai, ti volozu, wo li nuɓusɛiti pɔ bɛ, niiti duai wosu ti ʋa eteai zu ná pɛ, zii naa zobo golai bɛ, é ɠɔɠɔlo ti pɛ ma, nii ziɛ wolaiti ti ná-zooi zaamaʋɛ. 
Wo pɛ, etea ʋeaiti, wɔi wo zeini eteai zu, wa wɛlɛ poogi ʋa, é losu gizeiti maazu, siɛgi zu puʋugi vɛɛzu la, wa woilo ma ga pagɔ. 
Mazɔlɔɔ Ɠɔoɠɔ GALAGI wooi ɠaa mà: «Nà zeizu kpɛ, gè ɗa wɛlɛ, gè yɛ sèizuʋɛ, eɠɛ diegi é foloi ma wozakalagi zu, é nu ɠaazuɓɔizu, eɠɛ tonaɓiingi kpɛtɛai ga nɔɗagi molo leʋe liegi zu.» 
Aisa teʋe foloi, siɛgi zu pua vai ɓesu la, siɛgi zu ma ʋua ɠɛɛzu la ga ma ɠɔpɔgi, naa ɓɔi, toɠa ma ɓekegiti teʋe ba ga kpeleɠai, é kula ná, é ma ɓekegiti gaaleʋe. 
Ta ɠɛlɛ ti pɛ ba ʋɔɔma, ti ɠɛ ga gize zu wɔniiti daamianigi, ta dɔɓɔ zuaiti. Ɗuaiti ta ti-laɠagiti to ti zu foɠoi, dɔɓɔ zuaiti pɛ ta ʋa, ti samai ɠɛ ná. 
Naama volo ná, vebɛaniiti ta ʋa Ɠɔoɠɔ GALAGI ʋɔ, Fai-Pɛ-Maliɠii, naama nuɓusɛiti zea, ti ɠoozaai, ti volozu, nuɓusɛi naati duai wosu ti ʋa eteai zu ná pɛ, zii naa zobo golai bɛ, é ɠɔɠɔlo ti pɛ ma, nii ziɛ wolaiti ti ná-zooi zaamaʋɛ. Ta ʋa ga vebɛanii naati Siyɔn gizei ma, ʋɛ Ɠɔoɠɔ GALAGI, Fai-Pɛ-Maliɠii zeini ná. 
