﻿Ezayi.
14.
Mazɔlɔɔ Ɠɔoɠɔ GALAGI ɠa Zakɔɓe mavofodai maawɔinɠa, toɠa yiimazeɠe ʋolu ga Izilayɛle. É ti zei ʋele ɓɛtɛ ʋolu ta-yooi zu, seɠeseizuiti ta ʋu ti ma, ta ɠili Zakɔɓe ná-pɛlɛyeɠei ʋa. 
Nuɓusɛiti ti ga wɛɛinti, ta Izilayɛle ɠaiziɛ, ti lii la ná-zooi zu. Ɠɔoɠɔ GALAGI ná-zooi naa zu, Izilayɛle ɠa ti zo miná ga nɔnɔ, eɠɛ duɔiti, zunuiti ta anzanuiti. Toɠa naati kɛ ga kasoɠa nuiti, niiti ti tɔun kɛɛni ga kasoɠa nui. Toɠa ɠɛ ga ti-maliɠii, é zei ti unda. 
Izilayɛle, voloi Ɠɔoɠɔ GALAGI dooɠogi veezu la è ʋɛ, ɗa-ɓɔlɔiti ta ɗa-yiizoolɛiti poluma, duɔla ɓaaɓaagi ʋoluma é laani è ma, 
ɗa ɲɛɛɠulasu wuyei nii loo Ɓaɓilɔne masagi ma, ɗa ɠɛ ma: «Naa ɠɛɛʋɛ ɠale, deɠɛmu? Nu ɓɔlɔ nui la mɔ ná! Nu ɓɔlɔ vai ɓega! 
Ɠɔoɠɔ GALAGI faa ɲɔu ɠɛ nuiti ta-ɓakɔi ɠaleɠalea, ta seiunga nui ná-tukpɔi. 
Zɔi ná-ziiɠoloɠologi zu, é ɠɛni nuɓusɛiti doɠazu ga kpakɔi, dooɠo ge la ba, ná-ziiɠaawanai zu, é ɠɛni faa laazu ziiti ma, kɛlɛ tɔun ka za ti ʋilɛgai polu, dooɠo ge la ba. 
Eteai pɛ ka niina dooɠogi ta ziilɛigi zu, ta na koozunɛ wuyeiti toozu. 
Gului daa ga sipɛlɛgi, naati koozunɛɛʋɛ, too vai zu bu, Liɓan zɛdele guluiti ta ɠɛɛzu ma: ‹Kaipa è looni bu, nu la mɔ lɛɛzu, é ʋa gi ʋɔ.› 
Gɔvɛalaazu eteai é buu ʋelei, é ɓalia ɗa-vaa zu, é ʋa è laaɠomi, ɗa zeelina. Ti gɔvɛiti maaloɠa ɗa-vaa zu, etea lotuɠɔiti pɛ. Ti etea masagiti pɛ buzeɠea ta-ɓɔkpɔgiti ga. 
Ti pɛ ta ɓɔɛ è ʋɔ, ti ɠɛ è ma: ‹Ɗa ɓalaagi, zɛbɛ la è ya, eɠɛʋelei gi la, è ɠɛa ga gi ɠɛʋele!› 
Ɗa-wasogi è voɓega, è yei gɔvɛalaazu ɗa-o, ɗa-ɠɔni gooiti-yo. È-laama anii ɠɛa ga koegiti, ta kpeinɲaɠagiti ti ɠɛ ga ɗa-ʋɛɛmazeɠei. 
È looʋɛ ɠale! È zeɠe geeɠɔlɔgi zu, somideɠai é volozu, geelaalaosu loun zunui! Ɗa ɠaa, è ʋiliga ya zooi ma, ɗɛi è ɠɛa vɔnisu zii ɠiligiti ma! 
È ɠɛni bosu è-yiimaʋɛ ga: ‹Nà lɛɛzu geeɠɔlɔgi zu, nà nà-masa kpɔkpɔgi ʋilɛ GALA ná-somideɠaiti zeemaazuʋɛ, nà zei gizei naa ma, ʋɛ galagiti ta ɗa ta-ɠaalɛbai wo ná, lɛkpɛmaʋɛ nu ɠɔʋɛzuʋɛ ɓogi zu. 
Nà lɛɛzu tonaɓiingiti zeemaazuʋɛ, nà ɠɛ ga GALA kɛʋele, nii é Anii-Pɛ-Unda.› 
Kɛlɛ è loa bu, GALA ge è laaʋiligɛ, è yei gɔvɛalaazu zeɠezaɠai ɓomaʋɛ. 
Niiti ti è ɠaazu, ta ɠaazulosu è ʋa, ti ɗa è zumɔ: ‹Zunui tɛi nɔ zooi ɠɛni ɓalizu ná-faa zu, é ɗa masadaiti sasuɓali? 
É ɠɛni eteai zuwosu, é ɗa kɛ ga teʋebai, é ɗa taa wolaiti golo, é la ɠɛni yeeɓesu ná-kasoɠa nuiti ba pɛ, ti ʋa li ta-nuiti pɔ.› 
«Zii ɠiligiti ta-masagiti pɛ, ungo, ti pɛ, unfemai ɠa ti ʋɛ, ti ɗa looɠo, ti ɠilagilagi pɛ ta-ɠabaiti su. 
Kɛlɛ ɗɔun ɗa, è maaɠoozani ɗa-ɠabai ʋa, è ʋili ya, eɠɛ doin saai é ʋa zɔlɔɔ, nu luazu ba, eɠɛ poomaiti ti ɠɔdaaleʋeai ga boɠa zɔkpɔi ti ti laaʋiligai kɔtu yeɠeiti su, ti ɗa ɠɔɠɔlo ti-ma ʋoomaiti ma. 
È la ɓɔga ti ʋa, wo ɠɛ kaba ɠila su, mazɔlɔɔ è ɗa-yooi ɠoloɠoloni, è ɗa-nuɓusɛiti undaaʋilini. Ɲama ʋuu vofodai laasei ge la woga eyɛsu pɛ! 
À ná-doun zunuiti undaaʋili fai ɠɛʋele ɓɛtɛ, ti-ɠɛɛni ta-ɲama ʋuu vai maaʋele ma, ti ʋa wuzeɠe yeeta, ti ʋa eteai zo, ti ʋa eteai zulaave ga ta-laa wolaiti.» 
«Nà wuzeɠezu Ɓaɓilɔne nuiti daalɔɠɔma,» Ɠɔoɠɔ GALAGI, Fai-Pɛ-Maliɠii wooi ɠana. «Nà Ɓaɓilɔne laaseigi ɓale eteai zu, ta kɔɠɔ ʋogi, ta mavofodaiti,» Ɠɔoɠɔ GALAGI wooi ɠana. 
«Nà naa ɠɛ ga zɛligoiti puuzuʋɛ, ʋɛ palaʋalai ná, nà kpale ga faa zuɠoloɠolo kpalegi,» Ɠɔoɠɔ GALAGI, Fai-Pɛ-Maliɠii wooi ɠana. 
Ɠɔoɠɔ GALAGI, Fai-Pɛ-Maliɠii ɠonani, é ɠɛ ma: «Nà ma ɠonai wosu, nii é kìsu, daa ɠa zeeli, nii gè deveni, naa ɠa ɠɛ nɔ. 
Nà Asiili ná-zobogi zuɠoloɠolo nà-zooi zu, nà ɠɔɠɔlo ma nà-gizeiti ma. Unbawului é daai ti unma, nà naa zeɠe ti unma, kasɔi é daai ti unma, nà naa zeɠe ti unma.» 
Deve ɠaaɓelagi ɠana, Ɠɔoɠɔ GALAGI seɠeai eteai pɛ daalɔɠɔma, kpaazaɠai ɠana é bosu zii ɠiligiti pɛ ma. 
Ɠɔoɠɔ GALAGI, Fai-Pɛ-Maliɠii deve ɠaaɓelagi tɔna seɠea, ɓɛ ɠa a suɠoloɠolo? É yeewuzeɠea, ɓɛ ɠa a gaaɠale ma? 
Kpaazaɠai é woni, masagi Aɠaze zaa ɠonagi. 
«Filisiti yooi pɛ, à mina ɠoozunɛ ga kpakɔi wo ɠɛni loɠazu la é ɠaleɠalea! Mazɔlɔɔ kaali ma zape zu ɠa pɛɛɠaalii ɠulazu ná, é ɠɛ ga kaali ɲɔi. 
Bala nuiti nuɓusɛiti saama, ta ɠɔnɔgi zɔlɔɔ, maawɔin nuiti kpein ta ɠɛ dooɠogi zu ziilɛigi zu. Kɛlɛ ɗa ya, Filisiti yooi, nà ɗa-nuɓusɛiti paa ga pului, ta niiti ta yɛ ná, naati suwuɠaa ɠa leʋe. 
Ee, siɠidaʋɛ, gɔlɔi wo! Ee, taa wolai, kpeei loo! Filisiti yooi pɛ ge ɲiikpi. Mazɔlɔɔ duulu zɛbɛ gola ɠa ʋaazu, é zeɠe lɛkpɛmaʋɛ nu ɠɔʋɛzuʋɛ, nu nɔpɛ ge la kulazu ba, é li yɛ.» 
Gooɠaaʋotegi ɓɛgele ɠa ada fe Filisiti nuiti ta-ɠeelaiti zea? Ɠɔoɠɔ GALAGI Siyɔn loni. Niiti ti ga ɓɔɠɔmaayei nuiti ná-nuɓusɛiti su, naati ta lɔɔɠuzu zɔlɔɔ ná. 
