﻿Ezayi.
12.
Nuɓusɛ unmɔɔgaiti, wa ɠɛ ma, naama volo ná: «Ee, Ɠɔoɠɔ GALAGI, nà è maamusɛzu! Mazɔlɔɔ è yiiɠaawanani mà, kɛlɛ ɗa-yiiɠaawanai zeɠea màazu, è gàanɛɛnɛa. 
Wɛlɛ GALAGI ka é ga kìzo nui, gè ɓɔɠɔ ɠaliva tɔun ma, gè la mɔ luazu. Mazɔlɔɔ Ɠɔoɠɔ GALAGI, Ɠɔoɠɔ GALAGI ɠa é ga nà-zobogi, tɔ ɠa gè vaazu ma nà-guyeiti su, toɠa ga Kìzo Nui.» 
Wa ziɛi zaɠa ga koozunɛɛi kizo fai ma ɗɛungiti su. 
Naama volo ná, wa ɠɛ ma: «À Ɠɔoɠɔ GALAGI maamusɛ, à wooɠula ma. Ná-faa wolaiti é ti ɠɛai, à ti lɛ ga zii ɠiligiti, à daasei golai ma vaa wo ɛsɛ pɛ ma. 
À guyei loo Ɠɔoɠɔ GALAGI lɛbi vai ma, mazɔlɔɔ é faa wolaiti kɛa. À ti lɛ eteai zu ná pɛ! 
À pilɛ sɔlɔɔ koozunɛɛi lɛɛ, Siyɔn ʋeaiti! À wooɠula ga koozunɛɛi, mazɔlɔɔ gola wɔɔlɔʋɛ wo zaama, tɔungi é ga Izilayɛle ná-GALA Ɲadegai.» 
