﻿Ezayi.
11.
Naa ʋolu ma lobai ɠa ʋɔnɔ Izayi ma lɔkulugi ʋa, ma zapeiti ma ʋɔnɔbai ɠa wuzeɠe. 
Ɠɔoɠɔ GALAGI ná-Zɛnvui ɠa ɠɛ ba, ɠimalai ta keleɠelegi ma yɛnvui, deve wo fai ta fɔnifaamai ma yɛnvui, zɛnvui nii a Ɠɔoɠɔ GALAGI ɠwɛɛ da, é lua ba. 
Nɛɛbɛ vai ɠa ɠɛ ga é ɠolo Ɠɔoɠɔ GALAGI ʋɛ, é la tukpɔɠaaleʋea ga topolu, é la zaamazu vai ɠɛa ga ti ɠɛi. 
Kɛlɛ toɠa bala nuiti tukpɔɠaaleʋe ga telebodai, toɠa zaamazu logi wo ga sɔledai naati bɛ, niiti maavaawo nu la ti ʋɛ zooi zu. Daawooi ɠa ɠɛ eɠɛ kpakɔi, é ɗa eteai loɠa la, daa viilɛi ɠa a ɠɛ faa ɲɔu ɠɛ nui ʋaazu la. 
Telebodai ɠa ɠɛ saamaʋɛ ga saamaɠiligi, ladalai ɠɛ keelaʋɛ ga saamaɠiligi. 
Zuluɓui ta baala ziʋoi ta ɠɛ zeizu ada ɠila, kɔii ta boli yiʋoi ta ɠɛ laazu ada ɠila. Nikɛ yiʋoi ta zala yiʋoi ta ɠɛ laamiizu ʋɔɔma, zunu loungo goi ɗa wɛlɛ ti ma. 
Nikɛ zaai ta zuluɓu zaai ti-laamiizuʋɛ ɠa ɠɛ ga ada ɠila, ti-ma yiʋoiti ti ɗa ʋɛɛ ada ɠila, zalai ta nikɛi, ta ɠɛ tufai nɔ miizu. 
Ɲiimiɓɔlegi ɠa ɗa ɠaɠo gozagi ná-zeɠei laaʋɛ. Zunu loungo goi ɗa yeelɔ pɛɛɠaalii ma puuzuʋɛ. 
Faa ɲɔu nɔpɛ, ɓaa faa zuɠoloɠolo nɔpɛ ge la ɠɛa GALA ná-gizei ma. Mazɔlɔɔ Ɠɔoɠɔ GALAGI ɠwɛɛgai ɠa zooi laave, eɠɛʋelei ziɛi kpoloɗɛi ɓomaʋɛ zulaavegai da. 
Naama volo ná, Izayi mavofodai ɠa lo eɠɛ poogi nuɓusɛiti bɛ, zii ɠiligiti pɛ ta ɠaaʋote tɔun ma. Adaʋɛ ʋɛ a zei ná, naa ɠa volo ga GALA ná-lɛbiyai. 
Naama volo ná, Maliɠii ɠa wuzeɠe mɔnɔ ga é ná-nuɓusɛi mɔtaiti unmɔɔ, niiti ta Asiili yooi zu ta Ezipete yooi, ta Patɔlɔse, ta Etiyopi, ta Elame, ta Ɓaɓilɔne, ta Ɠamate, ta ziɛ zaama yooiti ta kpoloɗɛi laaʋɛ yooiti. 
Toɠa poogi lɛ, é zii ɠiligi naati tɛnɛ ga Izilayɛle nuiti ti zoni ga duɔiti, toɠa ti ɠaalɛ ba, é Zuda nuiti kpɔba, niiti ti vazani eteai ma zoko naanigɔi zu. 
Naazu Efelayime ná-tolo ɠa ɓe, ta ɓaai ti su ta Zuda, naa ɠa ɲɛɛlɛ. Efelayime la mɔ tolo ɠulaa ga Zuda, Zuda la mɔ ɠɛa ga Efelayime zili nu. 
Ta woola ma, ti loo Filisiti ɠizeiti ma folo liizu ʋelei, ta li folo ɠulazu ʋelei, ti teʋebai zu nuiti kɔligiti kula ti ya. Ta laalɛ Edɔme ta Moaɓe nuiti bu, ta zei Amɔn nuiti unda. 
Ɠɔoɠɔ GALAGI ɠa Ezipete ɓoloɗɛi vɔ. Toɠa zelii lo ziɛ wolai Efelate ma, daa viilɛ wolai zɛbɛi zu, toɠa ziɛ wolai naa ʋali su ma ɓeke dɔfela, saʋala ge la yɛga nu ɠɔɠɔa, é ɓudɛ ti maazu. 
Pele ɠila ka ɠɛ ná ná-nuɓusɛi mɔtaiti bɛ, ta yɛ vulua Asiili yooi zu, eɠɛʋelei é ɠɛni la Izilayɛle ʋɛ, naama volo ná, é ɠɛni lɛɛzu la, é ʋa zeɠe Ezipete yooi zu. 
