﻿Guyei Pagai Guyei Pɛ Ba.
8.
Ee, é ga è ɠɛni ga bàazeelai, nii é dèe ná-ɲiimii ɓɔleai! Nà la zoo gè è laaɠomi eteaʋɛ, gè è nɛɛnɛ, nu la ɓena sùɠula. 
Gè ɓena li ga ɗe dèe ná-pɛlɛi wu, è nɔ̀un kala, gè dɔɔ maku nɛɛnɛgi ve, è kpɔle, nà-gelenadegi ma ɗɛi. 
Kɔʋɛzu ʋele yeei ɠa é daazu nɔ̀ungi wu, é zeezai velevele mà. 
Zeluzalɛme anzalopoiti, nà wo maanɛɛnɛzu ga: À mina nɛɛbɛi maaloɠa, à mina maaloɠa, aisa é ʋa nɛɛ bɛ. 
Anzanui ɓɛ ɠanu, é ɠulazu teʋebai zu, é ɗa lɛ, tiɓigai nɛɛbɛ nui yeei ʋa? (Anzanui) Gè è maaloɠaʋɛ pɔme gului wu, ʋɛ è-lee è-ma ɠogi zeɠeai ná, ʋɛ è-lee è zɔlɔɔni ná. 
Nɔ̀un seɠe, è kɛ̀ ga poogi ɠɛʋele è-yiimaʋɛ, eɠɛ poogi nii é è-yeei ma. Tɔɔzei nɛɛbɛi zɛbɛi wɔɔlɔʋɛ ga saai ɠɛʋele, wɔinlai ɓaaʋɛ ga gɔvɛalaazu ɠɛʋele. Nɛɛbɛi ná-abuzogiti ta ga abu nɛ golai. 
Ziɛ wolai tanɔpɛ ge la zooga nɛɛbɛi ná-abui ʋaazu, ziɛ wolaiti ti la maaɓɔlega. Anɛɛ ɓalaa nui ta ɠa kɔligi kpein feezu nɛɛbɛi ɠeya vai ma, ɲɛɛɠulasu nɔ ɠa ma nu a sɔlɔɔ. 
Gá-zeela goi ta ɠa ná, é la dɛ ɓaɠoni, ɲiimi la dɛ ba. Leeni ɠa gi ʋaazu kɛɛzu bɛ, siɛgi zu ná-vulu vai maanɛai é ɠɛɛ la? 
Ni a ɠɛna ga siɠigi, gá kɔɔɠɔ ʋɛlɛiti to ma ga walii, ni a ɠɛna ga pɛlɛlaʋɛ, gi sɛdele kpogiti pilɛ da. 
Nɔ̀un nà ga siɠigi, ɲìimiiti ta ga siɠi gaaɠoozagiti. Naazu, nà ɠa gè ga ná-undaanɛɛi. 
Leezɛn ɓelei ta ɠɛni Salomɔn ya Ɓaale-Ɠamon, é kalivaa makɛ nua ma. Leezɛn waai ɠeya zɔngɔi ɠɛni ga wali ɠae waagila (1.000), nii ti ɠilagilagi ti ɠɛni feezu zea. 
Nɔ̀un, nà nà-leezɛn ɓelei makɛsu nà ɓɔɠɔi. Salomɔn, ɗɔun yeekɛ ɗa-wali ɠae waagilagi (1.000) ʋa, nii unfelegɔi (200) ɠɛɛzu ga gulu waa makɛ nuiti tɔnɔi. 
Ɗɛi è zeizu kpeleiti su, bɔ̀ɔlaiti goilogɛ è-woo ma. Ee, soma kae gè è woomɛni! 
Ʋela fala, nɛ̀ɛbɛ nui, veɠa ɓɔɠɔ ma eɠɛ dopai, ɓaa goe ziʋoi, tufa maku nɛɛnɛ gizei ma.
