﻿Guyei Pagai Guyei Pɛ Ba.
6.
Bo dɛɛ gi ma kae, ɗɛi è ʋagai anzaiti pɛ saama, mini ɠa è nɛɛbɛ nui liai ná? Pele ungi ɓɛgele ɠa é sogai? Gi ɓɔ è ʋa, ade gaiziɛ. 
Nɛ̀ɛbɛ nui yeiʋɛ ná-kpelei zu, ʋɛ é tufa maku nɛɛnɛgiti siingai ná, nii a kɛ é ná-togani ɓulugiti kɔnɔkula kpelei zu, ta é bulɛgi ma ʋuai ɠula. 
Nà nɛ̀ɛbɛ nui yeema, tɔ ɓalaa toɠa zèema. Toɠa ná-baalagiti kɔnɔkulazu bulɛgiti saama. 
È ʋagɛ, zìima anzanui, eɠɛ Tiilesa taa ʋapagi, è maanɛai eɠɛ Zeluzalɛme, è maayikiai ga kɔɔʋɛbɛi ɠɛʋele a ɠɛna kɔɔlaaɠai zu. 
Ɠaazu zeɠe bà, tɔɔzei toɠa zìiɓalizu. Ɗɔundeɠaiti kulaʋɛ ga boli ɓulugiti, niiti ti yeizu Galaade ɠizei ɠɔbuʋɛ. 
È-ɲiigaiti ta gàazu eɠɛ baala saa ɓulugi, niiti ti maaleɠaiti gaaleʋeai nɔ feya, ti ɗa zeɠe maagba wosuʋɛ. Ta ʋolu ga felefele, tanɔpɛ ge la ʋolu ɠila. 
È-ɠomagiti kɛɛʋɛ eɠɛ gelenade gulu waa ɓɔigi ma ʋalisuiti, ɗa-ɠaazu lɔɔɠu zeɠei ʋoluʋɛ. 
Masagi anzai niiti é ti vuluai, naati ta ga nu ʋuulɔzita (60), niiti ti la vuluni ga zɔiti kɛʋele, naati ti ɠɛ ga nu ʋuulɔsaʋa (80), anzalopoiti nu la zooga naati gaalusu. 
Nɔ̀un gaazu, anzanui ɠa ɠila kpe nɔ eteai zu, nà-poopo kolegi, gaavɔnigai. Kɛɠala la ná dee ʋɛ, tɔ ɠa é ga naa yiima loin. Anzalopoi zɔiti ta kaana, ta ɗa ɠɛ ma undaanɛɛʋɛ. Masagi anza ɠiteiti, ta zɔiti é la ti vuluni, naati ɓalaa ta ɗa maamusɛ ɠana nɔ, 
ti ɗa ɠɛ ma: «Anzanui ɓɛ ɠanu, é ɠulazu eɠɛ folo lie kulazuʋɛ? Pagai eɠɛ alugi, é volozu ga foloi ɠɛʋele? Maayikiai ga kɔɔʋɛbɛi ɠɛʋele a ɠɛna kɔɔlaaɠai zu?» 
Gè yeini nɔ feya gwaa wulu ɓelei zu, ga gè wɛlɛ gulu ʋɔnɔgiti ma pɛtugi zu, gè ka ni leezɛn ansaɠɔgiti ti zeiɗa ga, ni gelenade guluiti ti teʋea. 
Kɛlɛ gè la kwɛɛni, ʋelei zìima vai dàaʋiligai la, gè ɓɔɠɔ ɠa nà-masagi ná-nuɓusɛiti ta-wotoloiti saama. 
