﻿Guyei Pagai Guyei Pɛ Ba.
5.
Nà ga lɔ nà-kpelei zu, ee, anzalopoi, ɗɛi è ga ànza ɓeai, gè nà-miilegi ɠula ta tufa maku nɛɛnɛgiti, gè nà-kɔin sɛpɛgi mi, ta ma wulɔi, gè nà-dɔɔi ta nà-nɔnɔi ɓɔle. (Bɔɔlamaiti) Bɔ̀ɔlaiti, à daami wo, wo ɓɔɔle. Nɛɛbɛ nu felegɔiti, à dɔɔi ɓɔle, é wo zo. 
Gè ɠɛa ɲiizu, kɛlɛ zìi ɠɛa ɠaazu ɠa, gè nɛ̀ɛbɛ nui woomɛni, é ɗa pɛlɛi laaloɠa, é ɗa ɠɛ mà: «Pɛlɛi laalao, anzalopoi, zìima anzanui, nà-poopo kolegi, ɗɛi è ɠaavɔnigai. Mazɔlɔɔ nɔ̀ungi yɛɓɛa ga duɓui, kpidi ɗɛ ɠilagilagi é ʋilɛsu, naa nɔ̀undeɠaiti zɛɓɛa.» 
Gè nà-seɠei ɠulaa ɠɔba, nà too ɠale ʋolu? Gè kɔ̀ɠɔiti maagbaa, nà ti nɔɠɔzu ɠale ʋolu? 
Nɛ̀ɛbɛ nui ɠa yeeleʋesu fenɛtɛlɛ laaʋɛ, kɔɔlɛ ɓooi ɗa yei ga ze. 
Gè wuzeɠea ga gè pɛlɛi laalao nɛ̀ɛbɛ nui ʋɛ, miile gulɔ maku nɛɛnɛgi yeiɗa zèei ta zèeɓeɠaiti zɔɠɔzuʋɛti, gè ɗa pɛɛ sɔɠɔgi ʋa. 
Gè pɛlɛi laalaoga nɛ̀ɛbɛ nui luɠɔ, kɛlɛ é lia, é la mɔ ná, gè ɠɛ unga wuulee. Gè ɠulani gaiziɛ vai ma, kɛlɛ gè la kaani. Gè ta nɔ lolini, é la gòoɠaaʋoteni. 
Gi ɠomini gá taa makɛ nuiti, ti ɗa lati taai ma. Ti dòɠani, ti màawana, ti nà-pɛɛkɔmai ɠula zèa. 
Ee, Zeluzalɛme anzalopoiti, nà wo ɠaazaɠasu: Wa nɛ̀ɛbɛ nui ɠaana, leeni ɠa wo bosu ma? À ɠɛ ma nɛɛbɛ zeeɓɛi ɠa é bà. 
Bo dɛɛ gi ma, ɗɛi è ʋagai anzaa zaama, leeni ɠa é è nɛɛbɛ nui ya, é la taɠili zea? Gaamazu, lee ɓa ka é è nɛɛbɛ nui ya, é la taɠili zea, è gi ɠaazaɠasu ga niima laali? 
Nɛ̀ɛbɛ nui lɔtɔʋɛ, kɛdɛgɛ, ʋili nɔpɛ ge la ma, anɛɛ nu waapuugɔ (10.000) zaama. 
Nɔungi ɠulaʋɛ ga zanu kitei, nɔundeɠai ʋɛɛni ma fɛlɛɓɛɓɛ, nɔundeɠa lɛiɗai eɠɛ kalawɔni. 
Gaazuɠɛzɛiti kulaʋɛ ga poopo kolegiti ti ziɛi laaʋɛ, ti ɗa maagba ga nɔnɔi, ti ɗa ɲi kpɛtɛi zaama. 
Komagiti kɛɛʋɛ eɠɛ tufa maku nɛɛnɛ kpelei, ti-maku nɛɛnɛgi ɗa ɠula. Dakɔlɔgiti ta ga bulɛgiti, ʋɛ miilegi ɠulazu ná. 
Zeeɓeɠaiti kɛɛʋɛ eɠɛ zanu balaɠaegiti, daavegai ga kɔtu zɔngɔ ɓaagiti. Kpusɛi ɠɛ eɠɛ see ɲiiga zɛpɛgi, nii doungai ga kɔtu ɓiinii. 
Kɔɠɔiti kulaʋɛ ga kɔtu ɠole kpɛdɛgi, nii kpadɔai zanugi ma. Maayikiai eɠɛ Liɓan ɠize ɲɛkpɛi, sulogai eɠɛ sɛdele guluiti. 
Daa ɠoozuʋɛ nɛɛʋɛ gola, kpusɛi pɛ ge ɛ̀nɛkɛga. Ee, Zeluzalɛme anzalopoiti, gaamazu, ʋele ɠana nɛ̀ɛbɛ nui la, ʋele ɠana zìima nui la. 
