﻿Guyei Pagai Guyei Pɛ Ba.
4.
Ee, è ʋagɛ zìima anzanui, ee, è ʋagɛ! È-ɠaazuɠɛzɛiti kulaʋɛ ga poopo kolegiti ɗa-ɠaazu lɔɔɠu zeɠei ʋoluʋɛ. Ɗɔundeɠaiti kulaʋɛ ga boli ɓulugiti, niiti ti yeizu Galaade ɠizei ɠɔbuʋɛ. 
È-ɲiigaiti ta gàazu eɠɛ baala saa ɓulugi, niiti ti maaleɠaiti gaaleʋeai nɔ feya, ti ɗa zeɠe maagba wosuʋɛ. Ta ʋolu ga felefele, tanɔpɛ ge la ʋolu ɠila. 
È-lakɔlɔgiti kpɔiʋɛ eɠɛ seɠe zakpa ɓɔigi, è-laaʋɛ wola ʋagɛ. È-ɠomagiti kɛɛʋɛ eɠɛ gelenade gulu waa ɓɔigi ma ʋalisuiti, ɗa-ɠaazu lɔɔɠu zeɠei ʋoluʋɛ. 
È-ɠɔgi ɠiliɠiligɛ eɠɛ Davide ná-siɠi gaaɠoozagi, kɔɔɠɔ zɛpɛ waagilagiti (1.000) ti zɛlɛni ba, ti kpein ti ɠɛ ga kɔɔɠuluɓaiti ta-ɠɔɔɠɔ zɛpɛ kiliɠiligiti. 
È-ɲiimi felegɔiti kulaʋɛ ga dopa yiʋo felegɔ, eɠɛ dopa zaai ma yiʋo felegɔ, ti tufai miizu bulɛgiti saama. 
Kpɔkɔ ɠaalɛilɛigi ɠa zeelina, niinigiti su ɠa wɔɔlɔna, wɔin ɠa mà ga gè li miile gizei ma, ansanse gizei ma. 
È ɓɛtɛ ʋelei pɛ pagɛ, zìima anzanui, nɛɛʋuzu nɔpɛ ge la è ʋa. 
Zeɠe Liɓan, è ʋa pɔ̀, ɗɛi è ga ànza ɓeai, zeɠe Liɓan, è ʋa pɔ̀! Yei, è zeɠe Amana ɠizei unmaʋɛ, naa ʋɛɛ Seniil gizei, ta Ɠɛɛlɛmɔn gizei ʋa, zalaiti ɲiizuʋɛ, ta kɔiiti ta-ɠizeiti. 
Ɗa wɛlɛna bà nɔ ɠila, naa ɠa kɛ̀ɛzu unga wuulee, anzalopoi, ɗɛi è ga ànza ɓeai, ɗa-ɠɔbu ani gila kpegi ɠa kɛ̀ɛzu ga ɗa-luɔi. 
Ɗa-wɔinlai wola ɠaanɛɛʋɛ, ee, anzalopoi, ɗɛi è ga ànza ɓeai, toɠa nu zosu é leʋe dɔɔi ʋa, ɗa-wulɔ maku nɛɛnɛgiti makugi nɛɛʋɛ, é leʋe siɛma wulɔi mɔtai pɛ ba. 
Ɗɛi è ga ànza ɓeai, è-lakɔlɔgiti ta kɔin gulɔi ɓɛtɛzu, kɔin gulɔi ta nɔnɔi ta ɠulazu è-nɛgi wu. È ɠɔba zeɠeiti kugi ɠulaʋɛ ga Liɓan wului ɠugi. 
Anzalopoi, ɗɛi è ga ànza ɓeai, ɗa ɠa è ga nà-kpelei sasai ma, ziɛungi daaɠulugai kpe. 
È-ɠaalaagiti ta ga gelenade kpelei, nii gaawaaiti gola ʋagai, naa ʋɛɛ ɠɛneegi ta naalegi ʋa, 
naalegi ta safalain, naa ʋɛɛ seeli kpaɠa maku nɛɛnɛgi ta kanɛlegi ʋa, ta gului ma zii pɛ kugi nɛai, naa ʋɛɛ alɔwɛgi ʋa ta miilegi, é ʋɛɛ ansanse pagɔi kpein ba. 
Ɗa ɠa è ga nà-ziɛungi nà-kpeleiti faa ma, kɔtuɗɛi nii é yeizu, é ɗa zeɠe Liɓan. 
À ɠula ɲiimɛnii zu, lɛkpɛmaʋɛ nu ɠɔʋɛzu ʋelei, ta nu yeezazu ʋele viilɛiti, wo ʋa, wo ʋu nà-kpelei ma, nii a kɛ maku nɛɛnɛgi ɠula. Nɛ̀ɛbɛ nui lɔɔna ná-kpelei zu, é ma wulu waa nɛɛnɛgi ta mi. 
