﻿Guyei Pagai Guyei Pɛ Ba.
3.
Zɛ̀gɛ laani nà-betei zu kpidii, gè ɗa zìima nui ɠaiziɛ, gè gaiziɛʋɛ, kɛlɛ gè la kaani. 
Gè ɠɛni ɓɔɠɔ ma: «Nà wuzeɠezu mu, gè taai lati, gè leʋe koi yɔɠɔzuʋɛti, ta maaɓɔ bosuʋɛti, gè zìima nui ɠaiziɛ.» Gè gaiziɛni, kɛlɛ gè la kaani. 
Gi ɠomini gá taa makɛ nuiti, ti ɗa lati taai ma. Gè ti ɠaazaɠani ga: «Wo la zìima nui ɠaani bɛ̀?» 
Gè leʋeni nɔ ti ʋa feya, gè zìima nui ɠa. Gè soni zeei ʋa, gè la mɔ ɓeni ba pɛ, eyɛsu gè lɛɛ la sɔ̀lɔɔ deei ná-pɛlɛi wu. 
Zeluzalɛme anzalopoiti, nà wo maanɛɛnɛzu dopaiti ta goegiti daaseigi zu, ti dɔɓɔi zu: À mina nɛɛbɛi maaloɠa, à mina maaloɠa, aisa é ʋa nɛɛ bɛ. 
Ɓɛ ɠanu, é ɠulazu teʋebai zu, é ɗa lɛ eɠɛ abu luulu, makugi nɛai eɠɛ miilegi, naa ʋɛɛ ansansegi ma zii pɛ ba? 
Salomɔn laa ʋetei ʋe, maaɠakugai ga zɛbɛsu nu ʋuulɔzita (60), Izilayɛle zɛbɛsu nuiti saama. 
Boɠa zɔkpɔi ɠa ti pɛ zea, ti ɠalagai ga kɔɔi. Ɛsɛ saamaɠiliʋɛ ga ná-kɔɔɠɔ zɔɔla, kpidii zu vaaɓaagiti daalɔɠɔma. 
Ti Salomɔn zeɠe ɓɔkpɔgi ɓɛtɛʋɛ ga Liɓan wului. 
Ti ma ɓɛdɛgiti kpɛtɛʋɛ ga walii, tiɓisuʋɛ ɠɛ ga zanugi, ti seɠe ɓɔkpɔgi ɓɛtɛ ga zalama zeɠei, Zeluzalɛme anzalopoiti ti suʋu ga nɛɛbɛi. 
Ee, Zeluzalɛme anzalopoiti, à ɠula, wo masagi Salomɔn ɠa, masa bɔɔlɔgi unma, nii dee dɔɔni unma, ná-vulu ɠɛɛ voloi, yeei koozunɛɛi ziimaʋɛ pɛ daaveni la. 
