﻿Guyei Pagai Guyei Pɛ Ba.
2.
Nà ga tufai, nii é ʋuazu Salon nɛmɛi zu, nà ga pɛtu su wulɛgi. 
Ʋelei bulɛgi a ɗa ɠɛ la ɠaingiti saama, ʋele ɠana zìima anzanui la anzalopoiti saama. 
Ʋelei nɔ pɔme gului la dɔɓɔ wuluiti saama, ʋele ɠana nɛ̀ɛbɛ nui la zinipoiti saama. Nɛɛʋɛ bɛ̀ ga gè zei ná-niinigi wu, gaawaai nɛɛʋɛ dàaʋɛ. 
É lɛa ga ze fɛti ɠula ʋɛlɛi wu, ná-poogi é màazu, naa ɠa ga nɛɛbɛi. 
À kɔ̀nɔkula ga leezɛn vɔɔiti, nii a kɛ gè zɛbɛ zɔlɔɔ, à kɔ̀da yɛɓɛ ga pɔmegiti, gè gaaɓaa zɔlɔɔ, tɔɔzei gè zeeɓɛa ga nɛɛbɛi. 
Kɔʋɛzu ʋele yeei ɠa é daazu nɔ̀ungi wu, é zeezai velevele mà. 
Zeluzalɛme anzalopoiti, nà wo maanɛɛnɛzu dopaiti ta goegiti daaseigi zu, ti dɔɓɔi zu: À mina nɛɛbɛi maaloɠa, à mina maaloɠa, aisa é ʋa nɛɛ bɛ. 
À woilo dɛɛ, nɛ̀ɛbɛ nui wooi ɠanu, é lɛɛzu, tɔ ɠanu é ʋaazu ga ɓudɛa gize goiti ta gize wolaiti maazu. 
Nɛ̀ɛbɛ nui ɠulaʋɛ ga dopai ɓaa goe ziʋoi. Wɛlɛ ba loni gá-zasai ʋoluʋɛ, é ɗa wɛlɛ gá-venɛtɛlɛ laaʋɛti. 
Nɛ̀ɛbɛ nui ɓɔɛ pɔ̀, é ɠɛ mà: «Wuzeɠe, zìima anzanui, nà-nu ʋagɔi, ʋa! 
Samai leʋega, tonai looɠoga, é leʋega. 
Zooi zu ná pɛ tufaiti ti ʋua, guye loo ziɛgi zeelia. Nu kpumagoi wooi mɛnisu, é ɗa guyei loo ada-yooi zu. 
Kooleɠoole gwaaiti ti ɗa ɓɔi niina ti-ma wuluiti ga, leezɛn ɓeleiti ti teʋea, ti-maku nɛɛnɛgi ɗa ɠula. Wuzeɠe, zìima anzanui, nà-nu ʋagɔi, ʋa! 
Ɗɛi è ga nà-poopo kolegi, è-laɠagi logai fasa yeɠeiti su, ta ada zɛlɛgiti ma lɔɔɠuzuʋɛti. Ɠaazuʋɛ ɠula lɛɛ, gè è-ɠaazuʋɛ ɠa, ta gè è woomɛni, mazɔlɔɔ è-wooi wola nɛɛʋɛ, è-ɠaazuʋɛ wola ʋagai. 
«À wansai niiti so dɛɛ gi ʋɛ, wansa yiʋoi niiti, tiya ɠa ti faa zuɠoloɠologi ɠɛɛzu gá-leezɛn ɓeleiti su, tama naati ti teʋea.» 
Nɛ̀ɛbɛ nui ɠa zèema, nà ɓalaa gè ɠɛ zeema, toɠa ná-baalagiti kɔnɔkulazu bulɛgiti saama. 
Kpɔkɔ ɠaalɛilɛigi ɠa zeelina, niinigiti su ɠa wɔɔlɔna, ɠale ma, nɛ̀ɛbɛ nui, è ʋa, veɠa ɓɔɠɔ ma, eɠɛ dopai ɓaa goe ziʋoi a ɠɛ ada zɛlɛgiti. 
