﻿Guyei Pagai Guyei Pɛ Ba.
1.
Guyei nii pagai guyei pɛ ba. Salomɔn ná-guyei. 
Ee, nɛ̀ɛnɛ ga è-laaʋɛ, è nɛ̀ɛnɛ! Ɗa-nɛɛbɛi ɠa sòsu, é leʋe dɔɔi ʋa. 
Ɗa-wulɔiti kugi wola nɛɛʋɛ. È-laaseigi ɠulaʋɛ ga gulɔi nii maku nɛɛnɛgi liizu, naa ɠa é kɛɛzu anzalopoiti ti wɔinzu la ga ɗe. 
Sò zèei ʋa, è mɛ̀ɛn, de ɓizɛ ʋɔɔma! Masagi lɛɛʋɛ ga ze ná-pɛlɛ ɠoozu ʋɛlɛiti bu. De ɠoozunɛ, de ɠɔkɔ è-zaalai zu, de ɗa-nɛɛbɛi ma ɠoozunɛɛi ɠula, nii é nu zosu, é leʋe dɔɔi ʋa! Gaama ɠa anzalopoiti zea ga ti wɔin ga ɗe. 
Zeluzalɛme anzalopoiti, kɔ̀lɔgi maalɛitɛigɛ, kɛlɛ pàgɛ, eɠɛʋelei Kedaal zeɠe ɠota maalɛitɛigiti ti la, ta Salomɔn ná-seɠe zuɠooza gola zuʋua ʋapagiti. 
À mina wɛlɛ màalɛitɛi pelei nɔ ʋa, ga tɛi gàlaai foloi ʋɛ. Kɛ̀ɛlointi ka ti yiiɠaawanani mà, ti ɠɛ, gè ɗa wɛlɛ leezɛn ɓeleiti ma. Gè la wɛlɛni nà ɓɔɠɔi nà-leezɛn ɓelei ma. 
Mini ɠa è ɗa-ʋaala kpulugi makɛsu ná? Ee, zìima nui, ná lɛ ga ze kae, mini ɠa ná ga ta-looɠo bosuʋɛ è ya folo gaalɔgai? Nii a kɛ gè mina ɠɛ ga teʋeteʋe nu è-wɔɔlaiti ta-ʋaala kpulugiti koba. 
Ni è la naa zuɠwɛɛni, ɗɛi è ʋagai anzanuiti kpein saama, ɠula, è ʋilɛ baalagiti kɔɠɔ ɠoba, ɗa-woli yiʋoiti kɔnɔkula togani makɛ nuiti ta-ɠotaiti kobaʋɛti. 
Ee, zìima anzanui, è ʋagɛ eɠɛ soo zaai nii Falaɠɔn ná-wotoloiti giliai ba. 
È-ɠomagiti gola ʋagɛ ɗa-woizu anigiti saama. È-ɠɔgi ɠeeluai ga pagɔ ɗa-ɠɔbu anigiti saama. 
Da zanu goizu anigiti kpɛtɛzu è ʋɛ, ti ʋɛlupɛlugai ga walii. 
Nà-masagi ɠɛai ma daazuʋɛ, nà-naal gulɔi maku nɛɛnɛgi ɠɛni ɠulazu. 
Nɛ̀ɛbɛ nui ɠa bɛ̀ ga miilegi ma liʋɛi, toɠa ɲiizu piin ɲìimiiti zɔɠɔzuʋɛ. 
Eɠɛʋelei gulu ʋuai yisɔyisɔgiti ti la En-Gedi leezɛn ɓelei zu, ʋele ɠana nɛ̀ɛbɛ nui la bɛ̀. 
Ee, è ʋagɛ! È ʋagɛ, zìima anzanui, è-ɠaazuɠɛzɛiti pagɛ eɠɛ poopo kolegiti. 
Ɗa ɓalaa è ʋagɛ ɗɛ! Nɛ̀ɛbɛ nui, ɗa nu ɛnɛkɛ. De laa ʋetei ɠa ga tufa lɛnugi. 
Sɛdele guluiti ti ɠɛ de maazu ga dakai, sipɛlɛ guluiti ti ɠɛ ga da-ʋɛlɛi ma leʋesuiti. 
