﻿Tɛnɛbo Nui.
3.
Fai pɛ ma yeeɠɛɠala ɠa ná, fai kpein ná-yeeɠɛɠala ɠa ná geeɠɔlɔgi wu. 
Yeeɠɛɠala ɠa ná nu zɔlɔɔ, yeeɠɛɠala ɠɛ ná nu za. Yeeɠɛɠala ɠa ná nu anii zin, yeeɠɛɠala ɠɛ ná nii siingai, nu naa ɠula. 
Yeeɠɛɠala ɠa ná nu paai wo, yeeɠɛɠala ɠɛ ná è kɛdɛgi wo. Yeeɠɛɠala ɠa ná nu pɛlɛi ɠolo, yeeɠɛɠala ɠɛ ná è pɛlɛi lo. 
Yeeɠɛɠala ɠa ná nu ɲɛ, yeeɠɛɠala ɠɛ ná è wɔlɔ. Yeeɠɛɠala ɠa ná nu saa wɔlɔi wo, yeeɠɛɠala ɠɛ ná è kuai wo. 
Yeeɠɛɠala ɠa ná nu kɔtuiti pili ya, yeeɠɛɠala ɠɛ ná è ti yɛʋɛ. Yeeɠɛɠala ɠa ná nu nɛɛnɛi wo, yeeɠɛɠala ɠɛ ná è ɠɛlɛ nɛɛnɛi ʋa. 
Yeeɠɛɠala ɠa ná nu anii ɠaiziɛ, yeeɠɛɠala ɠɛ ná è too ya. Yeeɠɛɠala ɠa ná nu anii makɛ, yeeɠɛɠala ɠɛ ná è pili ya. 
Yeeɠɛɠala ɠa ná nu anii ʋali ga, yeeɠɛɠala ɠɛ ná è daɠa. Yeeɠɛɠala ɠa ná nu maaɠɛ kpɔ, yeeɠɛɠala ɠɛ ná è ɓɔɛ. 
Yeeɠɛɠala ɠa ná nu nɛɛbɛi ɠɛ, yeeɠɛɠala ɠɛ ná è wɔinzeɠemai ɠɛ. Yeeɠɛɠala ɠa ná kɔɔi ɠɔ, yeeɠɛɠala ɠɛ ná kɔɔi ɓe. 
Kulanumai ɓɛgele ɠa botiɠɛ nui sɔlɔɔsu ná-kpɔlɔi zu? 
Gè botiiti kaa, niiti GALA ge ti laai nuɓusɛiti unma. 
GALA ge anii kpein kpɛtɛʋɛ ga pagɔ, é zoloo ná-yeeɠɛɠalai ma. É ɠɔoɠɔ fai ɠwɛɛ kisiɛi lɔɔʋɛ vɔlɔ nuɓusɛiti ziimaʋɛ. Tama ti la zoosu ti ʋa GALA ná-kɛɛwotii pɛ gaaɠa. 
Gè kwɛɛgɛ naazu ga nii ɠila kpegi fizɔgai nuɓusɛi ma, naa ɠa ga, é ziimaɠɛɛi ta ɠɛ, ta é koozunɛ yeeɠɛɠalai ve ɓɔɠɔ ya sii ma voloi pɛ su. 
Nu-o-nu é laamiizu, é ɓɔɔle, é ɠoozunɛ ná-botiiti su, GALA ka é naa vea bɛ. 
Gè kwɛni ga nii kpein GALA ge kɛɛzu, ta yɛsu ná ɠɔ, nu la ta ʋɛa ba, nu ma ge la ta zeɠea ba. GALA ge naa ɠɛɛʋɛ, nii a kɛ nuɓusɛiti ti lɛbiyai ve bɛ. 
Fai nii é ɠɛɛzu niizu, ta nii é ʋaazu ɠɛɛzu ʋelela ʋelei, naati kpein kɛɛʋɛ na wɔlɔwɔlɔi zu. GALA faaʋɛ bu ga faiti ti ɗa ɠale ma, ti ɠɛ ʋolu. 
Gè niima vai ɓalaa kaaʋɛ zooi ɠa: Ʋɛ tukpɔi maanɛai ga é leʋe ná, ta telebodai zei ná, miná ɠa suɲɔulai zeini ná. 
Gè ɠɛni ɓɔɠɔ ma naazu: «GALA ka ʋaazu nu ɲɔi ta telebo nui lukpɔɠaaleʋezu, mazɔlɔɔ fai pɛ ta kɛɛwotii pɛ ka ɠɛɛzu ná-yeeɠɛɠalai ma.» 
Gè boni ɠisu ga GALA ka nuɓusɛiti poluɠulazu, é dɛɛ ga tiye ga ti la vizɔni suaiti ba. 
Mazɔlɔɔ nu vului ta suai ti-ɠaaɓelazuʋɛ ɠa ga faa ɠila nɔ. Zɛnvu viilɛ ɠilagi nɔ ɠa é nuiti ta suaiti su, ti zeizu felegɔ pɛ ta zaazu. Tosu wola ɠili tɛi é ʋa ɠɛ nui ʋɛ, é ʋa leʋe suai ʋa, mazɔlɔɔ ti kpein ka ga wafuun faa nɔ. 
Nii kpein é vulua, ti-liizuʋɛ ɠa ga ada ɠila nɔ, ti pɛ ta ɠalesu ma fufiligi zu, ʋɛ ti ɠulaai ná. 
Ɓɛ ɠa é kwɛɛ, ni nuɓusɛi yɛnvui ɠa lɛɛzu geezuʋɛ, suai yɛnvui ɗa yei zooi wu? 
Gè pɛtɛgɛ ga faa ɠili ge la vizɔni nuɓusɛi ma, kɛni é ɠoozunɛ ná-botii ma, naa ɠa é ga nɔnɔi. Mazɔlɔɔ ɓɛ ɠa a lo tuɠɔ, é ʋa naa ɠa, nii é ʋaazu ɠɛɛzu ga poluʋelei? 
