﻿Tɛnɛbo Nui Ná-Sɛʋɛi.
1.
Tɛnɛbo Nui laawooiti kaa, Davide ná-doun zunui, é ɠɛni ga masagi Zeluzalɛme. 
Tɛnɛbo Nui ɠɛ: «Wafuun faa ʋɛɛ wafuun faa ʋa, ti kpein ka ga wafuun faa nɔ.» 
Botii kpein nuɓusɛi kɛɛzu zooi ɠa, ná-kulanumai ɠa su ga leeni? 
Yeeɠɛɠalai ta ɠa leʋesu ta su nuiti, yeeɠɛɠalai taɠili ge ʋa ta su nuiti, tama zooi ɠa ɠɛʋelei nɔ ma. 
Foloi ɠa ɠulazu, foloi li, é ɠaazuvilɛ ga é ɠaaɠale ma, ʋɛ seɠeai ná. 
Fiilɛi ɠa ɗa li yeeta ga lɛkpɛmaʋɛ nu yeezazu ʋelei, yeeta lɛkpɛmaʋɛ nu ɠɔʋɛzu ʋelei, ʋele ɠana fiilɛi a ɗa latilati da, é ʋilɛ ná-pele wɔlɔmaiti ma ʋolu. 
Ziɛ wolaiti pɛ ta ʋuuzu kpoloɗɛi ma, tama kaipa kpoloɗɛi la vega. Ziɛ wolaiti ti la losu, ta liizu ti-liizu ɠilagi nɔ. 
Fai tanɔpɛ ge la losu, nu la zooga fai pɛ bosu, nu ɠaazuʋɛ yii la laa pɛ ga wozaɠaai, nu woiyeɠei yii la laa pɛ ga faa mɛnigi. 
Nii é ɠɛni ná mɔungi, naa nɔ ɠa é ʋaazu ɠɛɛzu ná. Nii é ɠɛɛni mɔungi, naa nɔ ɠa é ʋaazu ɠɛɛzu. Faa niinɛ nɔpɛ ge la zooi ɠa. 
Ni da ɠɛna ma: «Wɛlɛ, faa niinɛ ɠa-ee,» tama naama vai ɠɛni ná kaite wɔlɔwɔlɔ. 
Kɛlɛ nu ɠi ka é la mɔ wɔlɔwɔlɔ vaiti su, zɔiti ɓalaa ti ʋaazu ga ʋelela ʋelei, ti ʋoluʋele geleiti, ki ge la yɛga ti zu. 
Nɔ̀un nà, Tɛnɛbo Nui, gè masadai ɠɛɛʋɛ Izilayɛle unda Zeluzalɛme. 
Gè faiti buuʋɛtɛgɛ ga ɠimalai, niiti ti ɠɛɛzu zooi ɠa ná pɛ. Naa ɠa ga maanɔɠɔ woti, nii GALA ge nuɓusɛiti pilɛgai ma. 
Gè faiti kpein kaaʋɛ, niiti ti ɠɛɛzu zooi ɠa. Gè pɛtɛgɛ ga, ti pɛ ta ga wafuun faa nɔ, eɠɛ nu ɠa ɠɛ ɓizɛzu fiilɛi ʋolu ga é so. 
Anii suɓiligai, nu la zooga naa zɔlesu, anii nii é la ná, nu la zooga naa ɠaalusu. 
Gè ɠɛni ɓɔɠɔ ma: «Gè ɠimalai zɔlɔɔga, é wɔɔlɔ gola, é leʋe naati kpein ba, ti masadai ɠɛai tùɠɔ Zeluzalɛme. Gè ta ɓɔga nà-keleɠelegi ʋa, ta nà-faaɠwɛgi.» 
Gè ɠaaɓaaʋɛ ga gè ɠimalai ɠwɛɛ ta ɠimalalai. Gè pɛtɛgɛ, naa ɓalaa ka ga eɠɛ nu ɠa ɠɛ ɓizɛzu fiilɛi ʋolu ga é so. 
Mazɔlɔɔ pelei ta ɓɔsu la nu ɗa-ɠimalai ʋa, ʋele nɔ ɠana ta ɓɔsu la ɗa-iɲɔteʋei ʋa. Zɔi é ta ɓɔsu ná-faaɠwɛgi ʋa, toɠa ta ɓɔsu ná-ziizoolɛi ʋa. 
