﻿Tɛnɛ Faalaaliiti.
7.
Dòun zunu, mina yeema dàawooiti ma, nà-deveiti makɛ. 
Ni ɗa pɔ è zɛnvui wo, nà-deveiti so, è makɛ nà-kala gooiti ma, eɠɛ è-ɠaazuleegi. 
Ti lɔ yeeɓeɠaiti ba, eɠɛ balaɠaegiti, ti zɛʋɛ yiimaʋɛ. 
Ɠimalai leve ga è-ʋaazeelai, è keleɠelegi leve ga è-wɔɔlai, 
ga ti è ɠizo wɛɛnziɛ anzanui ma, ta è-zeiɲɔɠɔi anzai ná-tɛga ɓɔɛ nɛɛnɛgiti ma. 
Foloi ta, gè ɠɛni loni nà-fenɛtɛlɛi laaʋɛ, gè ɗa wɛlɛ eteaʋɛ. 
Gè buzeɠe niinɛgiti kaani, ti la dɛ faa pɛ poluɠwɛɛ, ti zaama, zunu loungoi ta ɠɛni ná, balagai ɠigi ma. 
É ɠɛni ziɛzu taazuʋɛ pelei zu, adaʋɛ tɔna ʋɛ naama anzanui ta ɠɛni loni ná, é liini ga naa ná-pɛlɛi ʋɔ pelei. 
É ɠɛni ga fitili pɛɛzuʋɛ, foloi liini niina, kpidii tɔɔzeini niina ga ʋɛa. 
Kɛlɛ wɛlɛ, anzanui daaɠomini, maaɠiliai eɠɛ koloɠolo anzanu, yaava ɠigi bɛ. 
É ɗa zɔngɔ, su la zoga, kɔɠɔiti ti la yɛga loni kpɛ ada ɠila. 
Taa zaamaʋɛ ʋeleiti su, ta ada wolaiti, adaʋɛ pɛ ka é ná-balii laazu ná. 
É zunu loungoi zo, é nɛɛnɛ, é ɠaazulo gaazuʋɛ ʋa, é ɠɛ ma: 
«Ziilɛi zalaɠaiti ka gè ɠɛa ti ɠulazu, za nɔ ɠa gè nà-minazeɠegi laazeeliai la. 
Wɛlɛ nii ɠa é kɛa gè ɠula, gè ʋa è laaɠomisu, gè ɠɛa pɔ gè è ɠa, gè è ɠaa. 
Gè nà-betei ɠaaɓɛtɛa, ga dasuzeɠei suʋuai, ta geze zeɠei é ga Ezipete gelei. 
Gè dàazuʋɛ makugi nɛa ga, miilegi, ta alɔwɛgi ta kanɛlegi. 
Ʋa de lɔ ziimaɠɛɛi zu, eyɛsu sobui zeeli, de lɔ ɓɔɠɔyiimai ma nɛɛbɛi zu. 
Mazɔlɔɔ sìnigi la ʋɛ, pɛlɛi wu, diiʋɛ siɛ ɠooza ma. 
É wali mɔinmɔin seɠeʋɛ ya, kɛni alugi a zeina gize la, é ʋa ʋa.» 
É vɔnini ma ga ná-keleɠelegi, é mɛɛnni ga ná-woo nɛɛnɛgiti. 
Gaamago nɔ, é ʋilɛni anzanui naa ʋolu, eɠɛ nikɛi ti liizu la paazuʋɛ, eɠɛ ɓoloɠa nui, ti gilizu ga, ti maaɠolo, 
eyɛsu mɛɛin sɔ zii ʋa, eɠɛ wɔnii é ɠaazuvilɛzu ga é ʋili tumɔi zu, é la inɛinɛsu ga zɛnvui, é faaɓaagi laawu. 
Dòun zunuiti, niizu niina, à woilo gòoi ma! À dama ga dàawooiti! 
Wo-yii mina valibo, é ʋa ʋilɛ anzanui niima zii ʋolu! À mina ɠaka, wo ʋa ʋilɛ ná-pelei ʋa! 
Mazɔlɔɔ ná-nu maawanaiti mɔinʋɛ, niiti ti zaai, ta niiti é ti undaaʋiligai, ti ɠɛni ga zɛbɛsu nu wolaiti. 
Ná-pɛlɛi ɠa é ga gɔvɛalaazu ʋelei, nii é yeizu saai zeizuʋɛ. 
