﻿Tɛnɛ Faalaaliiti.
5.
Dòun zunu, woilo ga pagɔ nà-ɠimala wooi ma, woilo nà-keleɠele gooiti ma, 
naa ɠa a kɛ, è zoo kidafaawui la, faaɠwɛgi ɠa ɠɛ è-laawooiti su. 
Mazɔlɔɔ wɛɛnziɛ anzanui laawooiti nɛɛʋɛ eɠɛ kɔin gulɔi, ti ʋagɛ eɠɛ siɛma wulɔi. 
Kɛlɛ ná-fai ɠaaɓelazuʋɛ ɠaa ɠa ɗa wana ga nu, eɠɛ siinziin ganigi, nii wanaai, gaaliʋɛ eɠɛ boɠa zɔkpɔi, nii gaaʋɛ fele. 
Siɛ ʋelei ɠa ɗa li ga nui saai ʋɔ pelei, kɔɠɔiti ta ɗa zeeli gɔvɛalaazu. 
É la ɗa ga yiizoolɛ ga, é ziɛ ga zɛnvu ʋelei, é la suɠwɛɛ ga toɠa ziɛzu ga kaka peleiti. 
Niizu deɠɛmu, dòun zunu, woilo gòoi ma, mina ɠɛlɛ dàawooiti ba, 
Maaɠooza naama anzanui ma zii ʋa, mina maaɓuɠa ná-pɛlɛlaʋɛ ʋa, 
naa ɠa a kɛ, è mina è ɠaazu unfegi lɔ zunu ɠili zeezu, ɗa-eteai mina lɔ zunu ɲɔu yeezu. 
Ni naa laade, è-mɔɔlɛzuʋɛ ɠa ɠɛ ga wɛɛinti daamiizu, ɗa-wotii zulɔnɔgi ɠa ɠɛ ga pɛlɛ ɠili bu ani, 
naa ɠa a kɛ, è mina li ɓalasu, ɗa-eteai ɠaaɓelazuʋɛ, siɛgi zu è-ɓusɛi kpein suyɔkɔgai na la, 
è mina ɠɛ ma: «Leeni vaa zu gè maaɠoloi wɔinzeɠeni? Leeni vaa zu tɛnɛgi la ɠɛni zoni zìi ma? 
Leeni vaa zu gè la ɠɛni woiloni nà-kalamɔinti gooiti ma? Gè la woiloni naati gooi ma, niiti ti kàlani? 
Ná tago nɔ, gè ʋa ɠɛ maanɔɠɔi zu, nuɓusɛiti ta-maaɓɔgi zaama.» 
È-anzai ɠɛɛʋɛ eɠɛ zeɠe ɗɛi. Ɓɔɔle ga zeɠe ɗɛi naa! 
Mina è yiima vai yɛ ná, é ʋa ɗa yei taazuʋɛ peleiti su, eɠɛ ziɛi, é ʋa ɗa vaza maaɓɔ bosu wolaiti. 
È yiima vaiti ti ɠɛ ga ɗa ɠila kpe nɔ ɗɔnɔ! Ti mina ɠɛ ga wo ɓɔma wa anzanu ɠiligiti. 
Ɠoozunɛ yeenɔpɛ su, wo eteai ziɛ ʋɔ, wa anzanui naa, nii è yiimazeɠeni la, è-ma nu niinɛlai zu. 
È-anzai ná-fai ɠaanɛɛʋɛ, ná-fai ʋagɛ eɠɛ dopai. Kpusɛi ɗa-ɠoozunɛɛi laazeeli yeenɔpɛ. Ɠoozunɛ siɛnɔpɛ su ná-nɛɛbɛi zu. 
Dòun zunu, leeni vaa zu è ɠaazuɠulazu nu ɠili anza ʋa? Leeni vaa zu ɗa ziilɛi gaiziɛ naama anzanui ya, nii é la ga ɗɔnɔ? 
Ɠɔoɠɔ GALAGI ɠa nui kpein siɛ ʋelei zumɔsu. Toɠa ɛsɛ kɛɛwotii ʋɛtɛsu. 
Faa ɲɔu ɠɛ nui ɠa ɗa zo, tɔ ɓɔɠɔi ná-faaɠaaza golai nɔ zu, toɠa ɗa zo, ga tɔ ɓɔɠɔi ná-kotoi ʋa ɠaluiti nɔ. 
Undaa ɠa ʋili, tɔɔzei é la zooni ɓɔɠɔ zosu, ná-ɠimalalai ɠa a ɗa paa. 
