﻿Guyeiti.
145.
Maamusɛ wuyei. Davide ná-guyei. Nà è mamasu gola, nà-GALAGI, nà-Masagi! Nà yɛ è-laaseigi lɛbizu, eyɛsu ɠɔ. 
Nà yɛ è lɛbizu folo nɔpɛ, nà yɛ è maamusɛzu eyɛsu ɠɔ. 
Ɠɔoɠɔ GALAGI wɔɔlɔʋɛ, toɠa maamusɛi kpein soloogai ma, nu la zooga é ʋa ná-bɔɔlɔi ɠaaɠa. 
Yeeɠɛɠalai ma nuɓusɛi ɠilagilagi pɛ ge ɗa-ɠɛɛwotiiti maamusɛ, faa wolaiti è ti ɠɛai, ti naati suɠula, 
ta ɗa-lɛbiyai é volozu, naama maayikii. Nɔ̀un, nà ɠigaiziɛzu ɗa-vaa maanɛɛnɛgiti su. 
Ti ɗa-zobogi maayiki vai wo, nɔ̀un nà, ɗa-vaa wolaiti ka gè ti zula. 
Ta ɠizɛ ɗa-nuɓɔɠɔlai wɔɔlɔ ʋelei zu, ti ɗa dɛɛ, ta guyei loo ɗa-zɔledai ʋɛ. 
Ɠɔoɠɔ GALAGI ɠa é zaalai veezu, é ɠɛ ga maawɔinɠaa ƓALAGI, zii la ɠula fala, kpɛtɛai wooɠɛɠiladai zu. 
Ɠɔoɠɔ GALAGI ʋagɛ nu pɛ bɛ, toɠa ga maawɔinɠaa ƓALAGI ná-kpɛtɛanii pɛ bɛ. 
Ɗa-ɓɛtɛaniiti kpein ti è lɛbi, Ɠɔoɠɔ GALAGI, ɗa-wooɠɛɠila nuiti ti è maamusɛ. 
Ta ɗa-masadai ma lɛbiyai ma vai wo, ti zeze ga ɗa-zobodai ma vai. 
Ɗa-vaa wolaiti è ti ɠɛai, ta nuɓusɛiti kala ga naati, naa ʋɛɛ ɗa-masadai ma lɛbiyai ʋa, é volozu. 
Ɗa-masadai ɠa ga ɠɔoɠɔ masadai, ɗa-ɠundiɠilai ɠa yɛsu ná, yeeɠɛɠalaiti pɛ su. Ɠɔoɠɔ GALAGI ɠa ga wooɠɛɠila nu ná-minazeɠegiti su, daavegɛ ga nuɓɔɠɔlai fai kpein su é kɛɛzu. 
Ɠɔoɠɔ GALAGI ɠa ɗa naati suzo, niiti ti loozu, é naati sɔle, niiti ti ɓiligai. 
Fuluaniiti pɛ gaazulogɛ è ʋa kitogi zu. Ɗa ɠa è ti ɠɔnɔgi veezu ti ya, ma yeeɠɛɠala ʋagɔi ma. 
Ɗa ɗa yeavie, è naati maavai kpein kɛ, niiti ti yɛnvuzu. 
Ɠɔoɠɔ GALAGI zɔlegɛ ná-fai pɛ su nii é kɛɛzu, nuɓɔɠɔʋɛ ná-kɛɛwotiiti pɛ su. 
Ɠɔoɠɔ GALAGI ɠa naati kobaʋɛ, niiti ti wooɠulazu ma, niiti dɔin ti wooɠulazu ma ga gaamai. 
Toɠa gaazuluaba nuiti ziima vaiti kpein kɛɛzu, a ta-ɓee wooi mɛnina, é ti ɠizo. 
Ɠɔoɠɔ GALAGI ɠa ɗa naati pɛ makɛ, niiti ti nɛai ʋɛ, kɛlɛ toɠa nu ɲɔiti kpein koloɠolo. 
Nà zeze ga Ɠɔoɠɔ GALAGI ná-maamusɛ vai. Kpɛtɛanii kpein ge dɛbi, tɛigi é ga GALAGI, ɲadegai, ta naa ɠɛ, eyɛsu ɠɔ. 
