﻿Guyeiti.
141.
Davide ná-guyei. Ɠɔoɠɔ GALAGI, nà wooɠulazu è ma, ʋa fala, è ɓɔ bà. Woilo gòoi ma, siɛgi zu gè wooɠulazu la è ma. 
Nà-maanɛɛnɛ wooi zɔle é lɛ è ʋɔ bɛ, eɠɛ ansanse gala luului, zèeiti ti maale è ma, eɠɛ kpɔkɔ zalaɠai. 
Ɠɔoɠɔ GALAGI, wɛlɛ dàaʋɛ ma, è ɠaaɓa mà, dàkɔlɔgiti ma ʋɛlɛlaʋɛti makɛ. 
Mina ɓe bà, gè ʋa li ga faa ɲɔi ʋɔ pelei, naa ɠa a kɛ, gè mina yaava ɠɛɛwotii ta ɠɛ nui naati saama, niiti ti telebotalai ɠɛɛzu. Màkɛ, gè mina naama laamii ta wo ti zaama. 
Nà va bu telebo nui dòɠa, toɠa ná-nɛɛbɛi lɛɛzu ga ze, ɓaa é zeliiti to mà, naa ɠa ga gulɔ ʋagɔi nɔ̀ungi zu, nii gè la ɠɛlɛa ba. Kɛlɛ nà-maanɛɛnɛ wooi ɠa faa ɲɔu ɠɛ nuiti ta-vaa ɲɔi laalɔɠɔma ʋolu yee ná nɔpɛ. 
Ta-ɠundiɠiiti ti ʋili ya fasaiti ma, nu ɲɔiti ta gaaɠa niina, ga kpɔ̀ɛ wooiti pagɛ. 
Eɠɛ nu a ɠɛ wozawolizu, é ɗa zooi laaʋali, ti-ma ɠaeiti ta vazasu gɔvɛalaazu ɠakalaʋɛ. 
Ee, Ɠɔoɠɔ GALAGI, Màliɠii, è ʋɔ pelei ɠa gè ɠaaʋotegai ná, nà lɔɔɠuzu ɠaiziɛzu è ʋɔ bɛ. Mina yee zeɠe zɛ̀nvui maazu. 
Makɛ mà, è kìzo telebotala nuiti ta-ʋaliiti ma ti ti laai tùɠɔ, ta ta-yaavaiti. 
Faa ɲɔu ɠɛ nuiti ti loo ti ɓɔɠɔ ʋaliiti ga, ti ʋoola bà naama ziɛgi nɔ zu. 
