﻿Guyeiti.
140.
Guye loo ɠundiɠii nɔnɔi ʋe. Davide ná-guyei. 
Ɠɔoɠɔ GALAGI, kùla nu ɲɔiti zea, kìzo toosu nuiti ma. 
Ta-ɠisiɛi ɠa ga faa ɲɔu ɠɛɛ vai nɔ, folo-o-folo, kpɔɛi nɔ ɠa ti gaiziɛzu. 
Ta ti-nɛgi ɠaalizu eɠɛ kaalii, kaali wanai ɠa é ɠulazu ti-lakɔlɔgiti bu. 
Ɠɔoɠɔ GALAGI, màkɛ, gè mina lɔ nu ɲɔiti zeezu. Makɛ mà, è kìzo toosu nuiti ma, niiti ti ɠisiɛzu ga ti tòo bu. 
Waso nuiti ti baliiti daa kɔ̀ɠɔ wu, nii a kɛ ti sò, ti galui ta tumɔiti daa, ti ti zei tùɠɔ pelei zu. 
Gè ɠɛ Ɠɔoɠɔ GALAGI ma: «Ɗa ga nà-GALAGI!» Ɠɔoɠɔ GALAGI, woilo nà-maanɛɛnɛ wooiti ma! 
Ee, Ɠɔoɠɔ GALAGI, Màliɠii, ɗa ga nà-zobogi, ta nà-kizogi, ɗa nɔ̀ungi makɛ kɔɔɠɔ voloi. 
Ee, Ɠɔoɠɔ GALAGI, mina va naa wu, faa ɲɔu ɠɛ nuiti bɛ, nii wɔin ti ma! Mina va bu, ta-vaazeikpasui ʋa zoloo, mazɔlɔɔ ta pilɛ sɔlɔɔ naazu. 
Niiti ti màaɠooliai, maanɔɠɔi nii ti wɔinɗai ga é zeeli nɔ̀un ma, naama maanɔɠɔi zei tiya ɓɔɠɔi ti ma! 
Abuleka ɠɛzɛi ʋu ti ma! Ti voɓe abui zu, zeɠezaɠai zu, ʋɛ ti la mɔ zooga ti ʋa wuzeɠe ná ɠɔ! 
Faa ɲɔu ɠɛ nɛgiti ti ɠula eteai ʋa! Maanɔɠɔi ʋilɛ toosu nui ʋolu, dooɠo ge mina ɠɛ ba! 
Gè suɠwɛɛ ga Ɠɔoɠɔ GALAGI ɠa telebodai ɠɛ bala nuiti bɛ, é sɔledai ɠɛ maanɔɠɔ nuiti bɛ. 
Naazu, telebo nuiti ta è-laaseigi maamusɛ wuyeiti too. Sɔle nuiti ta zei è ɠoba. 
