﻿Guyeiti.
139.
Guye loo ɠundiɠii nɔnɔi ʋe. Davide ná-guyei. Ɠɔoɠɔ GALAGI, è fɛ̀ɠɛlɛfɛɠɛlɛga, è kwɛ̀ɛ! 
Siɛgi zu gè zeizu la, ta siɛgi zu gè wuzeɠezu la, è ti pɛ kwɛɛ. Ɗa yɛsu ɠoozama, è nà-kisiɛi ɠwɛɛ. 
Siɛgi zu gè ziɛzu la, ta siɛgi zu gè laazu la, è ti pɛ kwɛɛ, è nà-peleiti pɛ kwɛɛ. 
Woo nɔpɛ ge ʋa ɠɛ é lɛ dà, ee, Ɠɔoɠɔ GALAGI, ɗa kwɛɛsu ɲɛgɛlɛin, nii gè ʋaazu bosu. 
È màalatigɛ, pòluʋelei ta kàkala ʋelei, è-yeei ɠa ʋɛɛni mà mɛɛ. 
È nɔ̀un kwɛɛ fai ɠana, naa wɔɔlɔʋɛ gàazu gola, kpudɛʋɛ nà-faaɠaaɠaiti pɛ maazu. 
Mini ɠa nà li ná, màaɠooza ɗa-yɛnvui ʋa? Mini ɠa nà ʋela, gè li ná, màaɠooza è ʋa? 
Ni nà lɛɛna geeɠɔlɔgi zu, ɗa miná, ni nà yeina gɔvɛalaazu, ɗa miná ɓalaa. 
Ni nà ɠoʋena, gè li folo ɠulazu ʋelei, ɓaa ni nà liina, gè zei kpoloɗɛi ʋoluʋelei, 
miná ɓalaa, è-yeei ɠa losu tùɠɔ, è-yeezai la ɓega bà. 
Ni nà ɠɛna ma: «Kpidii ɠa màalɔɔɠu, wozakalagi ɠa ɠɛ màaɠoolii zu ga kpidii,» 
kpidii zu la ɓidini è ɠaazu, kuai zu ɠalagɛ è ɠaazu, eɠɛʋelei wozakalagi la. 
Kɛʋelei gè su, ɗa ɠa è kpɛ̀tɛai ɠana, ɗa ɠa è fɛ̀lɛni dèe ɠoozu. 
È mama kɛ̀ɛzu ga kpɛtɛanii gola vizɔgai, ɗa laavɔɔ vaa wolaiti kɛɛzu, gè naa zuɠwɛɛ ga pagɔ. 
Dɔɔɠuzu ada la ɠɛni kpùsɛi ʋa è ɠaazu, siɛgi zu è ɠɛni kpɛ̀tɛzu la dɔɔɠuzu, è ɠɛai ma fɛ̀lɛzu zooi ɓomaʋɛ. 
Siɛgi zu gè ɠɛni la dɛ dèe ɠoozu, è ɠɛni kàazu, foloi liegɔi è kpɛtɛni bɛ̀, naa zɛʋɛʋɛ ɗa-zɛʋɛi zu, naazu ti tanɔpɛ ge la ɠɛni dɛ tɔɔzeini. 
Ɗa-ɠisiɛiti, ee, GALA, gè la zooga gè ʋa ti ɠaaɠa! Ti zuwɔɔlɔʋɛ gola! 
Ni gè ti ɠaaluni, ta la mɔin, ti leʋe ɲaɠaegi ʋa, nii é kpoloɗɛi ɠobaʋɛ. Wɛlɛ, nà wuunsu, gè ɠɛ è ʋa dɛ. 
Ee, GALA, soma è nu ɲɔi ʋaa! Nu ʋaa nuiti, à maaɠooza bà! 
Ta è-laaseigi wosu, ga tɔɠɔ ɠoloɠolo fai nɔ, ta bosu wafuun nɔ, tɛiti ti ga è zili nuiti. 
Ɠɔoɠɔ GALAGI, naati wɔinzeɠeʋɛ ma, niiti ti è wɔinzeɠezu, niiti è zakpesu, naati bɛlɛ la bɛ̀. 
Nà ti wɔinzeɠezu, ga wɔinzeɠemai ɓela ge la ba, nà ti levezu ga nà ɓɔɠɔi sìli nuiti. 
Ee, GALA, fɛ̀ɠɛlɛfɛɠɛlɛ, è ɠɛ zìimaʋɛ ɠwɛɛ. Pòluɠula, è ɠɛ nà-ziizoolɛ vaiti kwɛɛ. 
Pɛ̀tɛ, ni nà pele ɲɔu ma, è lo tùɠɔ, è pìlɛ ɠɔoɠɔ pele ʋagɔi ma. 
