﻿Guyeiti.
132.
Tɛɛ wo guyei. Ɠɔoɠɔ GALAGI, ɠigaiziɛ Davide zu, ta ná-kpɔlɔiti pɛ é ti woni. 
É niima minazeɠegi woni Ɠɔoɠɔ GALAGI ʋɛ, é niima minazeɠegi woni Zakɔɓe ná-Zɛbɛ-Su-ƓALAGI ʋɛ ga: 
«Gè la lɛa nà-pɛlɛi wu, nii gè bu, gè la lɛa nà-betei zu, ʋɛ gè laazu ná, 
gè la vaa bu, ɲiimɛnii ʋa lɔ gàazu, gàazu ɠɔlɔgi la pɛa ma mɛɛ, 
eyɛsu gè ada zɔlɔɔ Ɠɔoɠɔ GALAGI ʋɛ ga seizu, Zakɔɓe ná-Zɛbɛ-Su-ƓALAGI ʋɛ.» 
Wɛlɛ, gi yɛni Efelata, gi minazeɠe kesui maawoo mɛni, gi kaani Yaal lugi zu. 
Ade li Ɠɔoɠɔ GALAGI zeizuʋɛ, ade nɔkɔ ná-kɔɠɔloma anii ɠakalaʋɛ! 
Ee, Ɠɔoɠɔ GALAGI, ʋa ɗa-looɠo bosuʋɛ, wa ɗa-minazeɠe kesui, nii è-zɛbɛi ɠulazu kɛlɛma. 
Telebodai ɠa ɠɛ ɗa-zalaɠa ɠula nuiti kɔba, eɠɛʋelei ta ɗa seɠei loo la ɠɔba, ɗa-wooɠɛɠila nuiti ti wooɠula ga koozunɛɛi. 
Ɗa-nɛɛbɛi maaʋele ma, é lo ɗa-wotiɠɛ nui Davide ʋa, mina ʋoluave masagi ʋa, nii è gulɔi ziaai ma. 
Ɠɔoɠɔ GALAGI minazeɠeni Davide ʋɛ, é la zeɠea minazeɠegi naa ʋolu, é ɠɛni ma: «È-mavofodai ta ɠa gè seizu ɗa-masa kpɔkpɔgi ɠa, è-ʋotogi zu. 
Ni è-loun zunuiti ta ziɛna ga nà-minazeɠegi, ta nà-deveiti gè ti ɠalasu da, ti-loun zunuiti ɓalaa ta zei ɗa-masa kpɔkpɔgi ɠa yeenɔpɛ, eyɛsu ɠɔ.» 
Ungo, Ɠɔoɠɔ GALAGI yeeloni Siyɔn ʋa, é yiimazeɠe ga ná seizu vai zu. 
É ɠɛni ma: «Nà-dooɠo bosuʋɛ ɠa eyɛsu ɠɔ. Nà zei ná, mazɔlɔɔ wɔ̀inʋɛ ga ná. 
Ungo, nà tuya loo bɛ, gè ani ʋagɔiti pɛ fe zea. Nà daamianigi kpein fe bala nuiti zea, ti pɔ bɛ. 
Nà kizo fai loo ná-zalaɠa ɠula nuiti kɔba, ná-wooɠɛɠila nuiti ta wooɠula ga koozunɛɛi. 
Nà Davide ná-zobogi wɔɔlɔ Siyɔn, masagi gè gulɔi ziaai ma, nà naa ʋotogi ɠɛʋele ɓɛtɛ, eɠɛ lanboi é sosu. 
Nà sili nuiti maaɠili ga unfegi, kɛlɛ tɔun, ná-masa bɔɔlɔgi ɠa volo unmaʋɛ.» 
