﻿Guyeiti.
122.
Tɛɛ wo guyei. Davide ná-guyei. Kòozunɛɛni gola, siɛgi zu ti ɠɛni mà la: «Ade li Ɠɔoɠɔ GALAGI zei ʋɛlɛi ma ɠoizuʋɛ!» 
Wɛlɛ, gi-ɠɔɠɔiti ti loga ɗa-ziɠidaʋɛti, ee, Zeluzalɛme! 
Zeluzalɛme, taa wolai togai ga pagɔ, ná-siɠigiti kakugai ma, é ɠɛ ga ani ɠila kpe. 
Miná ɠa bolodamaiti ta ɗa ʋa ná, Ɠɔoɠɔ GALAGI ná-bolodaiti, ti ʋa, ti Ɠɔoɠɔ GALAGI maamusɛ náʋɛ, naa ɠa ga tɔgi Izilayɛle ʋɛ. 
Náʋɛ ɠa masa kpɔkpɔgiti ti ná, Davide mavofodai ʋɛ, ʋɛ é zeizu ná, é ɗa tukpɔi ɠaaleʋe. 
À GALA fali ga Zeluzalɛme ziilɛigi zɔlɔɔ, wo ɠɛ ma: «Zeluzalɛme, niiti ti è nɛai ʋɛ, naati ti eteai ziɛ ziilɛigi zu. 
Ziilɛigi masadai ɠɛ ɗa-ziɠigiti su, ta ɗa-masa pɛlɛiti ziilɛi ɓɔɠɔ ma tɔɔn.» 
Kɛ̀ɛleaiti ta bɔ̀ɔlaiti maaʋele ma, zìimai ɠa ga: «Ziilɛigi ɠɛ è ʋɛ!» 
Ɠɔoɠɔ GALAGI, ada-ƓALAGI zei ʋɛlɛi ná-fai maaʋele ma, nà undaanɛɛi ɠaiziɛzu è ʋɛ. 
