﻿Guyeiti.
118.
À Ɠɔoɠɔ GALAGI maamusɛ, mazɔlɔɔ pagɛ, mazɔlɔɔ ná-wooɠɛɠiladai ɠa yɛsu ná ɠɔ! 
Izilayɛle nuiti ti bo, ti ɠɛ ma: «Ná-wooɠɛɠiladai ɠa yɛsu ná ɠɔ!» 
Aalɔn mavofodaiti ti bo, ti ɠɛ ma: «Ná-wooɠɛɠiladai ɠa yɛsu ná ɠɔ!» 
Niiti ti luazu Ɠɔoɠɔ GALAGI ʋa, naati ti bo, ti ɠɛ ma: «Ná-wooɠɛɠiladai ɠa yɛsu ná ɠɔ!» 
Nà-kidaaʋiligi zu, gè wooɠulani Ɠɔoɠɔ GALAGI ma, é gòoɠaaʋoteni, é fìeni. 
Ɠɔoɠɔ GALAGI ɠa bà, gè la lua ani nɔpɛ ba, leeni ɠa nui a zoo é kɛ ga ze? 
Ɠɔoɠɔ GALAGI ɠa bɛ̀ ga nà-kpɔba nui, nà wɔ̀inzeɠe nuiti koloɠolosuʋɛ ɠa ga gàazuʋɛ. 
Fizɔgɛ nu Ɠɔoɠɔ GALAGI ɠɛ ga lɔɔɠuzuʋɛ, aisa nu ʋa li ɠalivaazu nui ma. 
Fizɔgɛ nu Ɠɔoɠɔ GALAGI ɠɛ ga lɔɔɠuzuʋɛ, aisa nu ʋa li ɠalivaazu seizumaanɛgiti ma. 
Zii ɠiligiti pɛ ti màalatini, Ɠɔoɠɔ GALAGI laaseigi zu, gè ti ɓulukpuluni. 
Ti màalatini, ti màavelevele, Ɠɔoɠɔ GALAGI laaseigi zu, gè ti ɓulukpuluni. 
Ti màalatini eɠɛ sɛlɛ kɔingiti, kɛlɛ ti zaani eɠɛ abui é zosu dɔɔ laa fɔɔi ʋa. Ɠɔoɠɔ GALAGI laaseigi zu, gè ti ɓulukpuluni. 
Ti dàaʋili gola, gè ʋa loo, kɛlɛ Ɠɔoɠɔ GALAGI ɓɔni bà. 
Ɠɔoɠɔ GALAGI ɠa é ga nà-zobogi, ta nà-maamusɛ wuyeiti ma ungi, tɔ ɠa é ga nà-kizogi. 
Koozunɛɛi ta unmɔɔgi ma ɓee wooiti ta telebo nuiti ta-zeɠe ɠotaiti buulaave. Ɠɔoɠɔ GALAGI yeezai ɠa botii ɠɛɛzu ga zɛbɛi! 
Ɠɔoɠɔ GALAGI yeezai wuzeɠeʋɛ! Ɠɔoɠɔ GALAGI yeezai ɠa botii ɠɛɛzu ga zɛbɛi! 
Gè la zaazu, nà yɛsu vulua, gè ɗa naa zuɠula, nii Ɠɔoɠɔ GALAGI kɛa ga kɛɛwotiiti. 
Ɠɔoɠɔ GALAGI màaɠoloni, kɛlɛ é la dɔ̀ɔni saai zu. 
À pɛlɛi laalao bɛ̀, nii makɛgai sɔle nuiti ta-vaa ma, miná ɠa gè lɛɛzu ná, gè Ɠɔoɠɔ GALAGI maamusɛ. 
Wɛlɛ siɠidaʋɛ ʋa, nii é liizu Ɠɔoɠɔ GALAGI ʋɔ bɛ, miná ʋele ɠa sɔle nuiti ti leʋesu da. 
Nà è maamusɛzu, tɔɔzei è gòoɠaaʋoteni, è ʋaani è ɠɛ ga nà-kizo nui. 
Kɔtui nii pɛlɛ lo nuiti ti ɠɛlɛni ba, naa ɠa kɛai ga sɔɓelama ɠɔtu wolai. 
Naama vai ʋaaʋɛ é zeɠe Ɠɔoɠɔ GALAGI ʋɔ, toɠa ga laavɔɔ vaa ade ɠaazu. 
Za ɠa ga foloi nii Ɠɔoɠɔ GALAGI kulaai, ade siɛ ga koozunɛɛi, de ɲaɠai ɠula, de ɠoozunɛɛ! 
Ɠɔoɠɔ GALAGI, kizo fai ve! Ɠɔoɠɔ GALAGI, undaanɛɛi ve! 
Ɠɔoɠɔ GALAGI tuya loo naama nui ʋɛ, nii é ʋaazu daaseigi zu! Gá tuya loozu wo ʋɛ, é ɠula Ɠɔoɠɔ GALAGI zei ʋɛlɛi wu! 
Ɠɔoɠɔ GALAGI ɠila kpe ka é ga GALAGI, tɔ ɠa é wozakalagi veezu de ya. À dɔɔ laaiti so ya, wo lɔ polu ʋɛbɛi zaama, eyɛsu wo zeeli zalaɠa ɠulazuʋɛ. 
Ɗa ga nà-GALAGI, nà è musɛzu, ee, nà-GALAGI, nà è maamusɛzu! 
À Ɠɔoɠɔ GALAGI maamusɛ, mazɔlɔɔ pagɛ, mazɔlɔɔ ná-wooɠɛɠiladai ɠa yɛsu ná ɠɔ! 
