﻿Guyeiti.
116.
Ɠɔoɠɔ GALAGI nɛɛʋɛ bɛ̀, mazɔlɔɔ toɠa ɗa gòoi mɛni, siɛgi zu gè maanɛɛnɛzu la. 
Tɔɔzei goilogɛ gòoi ma, nà yɛ wooɠulazu ma yeenɔpɛ, sìi ma voloi pɛ su. 
Saai ma ɠaluiti ti ɠɛa veleveleni mà, gɔvɛalaazu vaiti ma yiizoolɛiti ti ɠɛni mà, gè zeelini kidaaʋiligi ta ziizoolɛi ɠwɛgi ma. 
Kɛlɛ gè wooɠulani Ɠɔoɠɔ GALAGI ma, gè ɠɛ ma: «Nà è maanɛɛnɛzu, Ɠɔoɠɔ GALAGI, zɛ̀nvui ɠizo!» 
Ɠɔoɠɔ GALAGI ɠa ɗa nuɓɔɠɔlai ɠɛ, sɔlegɛ, ada-ƓALAGI ɠa ga maawɔinɠa ƓALAGI. 
Ɠɔoɠɔ GALAGI ɠa ɗa naati makɛ, niiti ti la dɛ faa mɔinmɔin kwɛni, tɔ ɠa é kìzoni, siɛgi zu màawɔinni la. 
Zìi, ɠaaɠale ma ɗa-yiilɛigi zu, mazɔlɔɔ Ɠɔoɠɔ GALAGI faanɛɛ ɠɛɛʋɛ è ʋɛ. 
Ungo, Ɠɔoɠɔ GALAGI, è ùnmɔɔni, è kùla saai ya, è gàazuɗɛiti kpale, è kɔ̀ɠɔiti seɠe too ʋelei ma. 
Nà yɛ ziɛzu fulu nuiti ta-eteai tɛi su, Ɠɔoɠɔ GALAGI ɠaazu. 
Ìɲɔ ge la ɠɛni leʋeni, anɛɛ siɛgi zu gè ɠɛni ɠɛɛzu ma la: «Màawɔinɗa gola!» 
Nà-ziiɓɔlɔi zu, gè ɠɛni ɠɛɛzu ɓɔɠɔ ma: «Nui kpein ka ga zɛɛ nu!» 
Leeni ɠa nà zoo gè kɛ Ɠɔoɠɔ GALAGI ʋɛ, ná-faanɛɛi kpein faa zu nɔ̀un tetema? 
Nà pilɛ sɔlɔɔ ziawɔi lɛ geezu, gè wooɠula Ɠɔoɠɔ GALAGI ma. 
Nà nà-minazeɠegiti daazeeli, niiti gè ti ɠɛa Ɠɔoɠɔ GALAGI ʋɛ, nà naa ɠɛ ná-nuɓusɛiti pɛ gaazu. 
Ɠɔoɠɔ GALAGI ná-wooɠɛɠila nuiti saa vai ɠa ɗa ɠɛ gaazu ga faa ɓaa gola. 
Ee, Ɠɔoɠɔ GALAGI, nà ga ɗa-wotiɠɛ zunui, nii ɗa-wotiɠɛ anzanui sɔlɔɔgai! È bà wɔinzeɠema ɠaluiti teʋea bà. 
Nà faanɛɛ wuuɠwɛɛ zalaɠaiti kula è ʋɛ, gè wooɠula è ma, Ɠɔoɠɔ GALAGI. 
Nà nà-minazeɠegiti daazeeli, niiti gè ti ɠɛa Ɠɔoɠɔ GALAGI ʋɛ, nà naa ɠɛ ná-nuɓusɛiti pɛ gaazu, 
Ɠɔoɠɔ GALAGI ná-koizuʋɛti, Zeluzalɛme laaʋeaiti saama. À Ɠɔoɠɔ GALAGI maamusɛ! 
