﻿Guyeiti.
112.
À Ɠɔoɠɔ GALAGI maamusɛ! Undaanɛ nu ɠa ga naama nui, nii é luazu Ɠɔoɠɔ GALAGI ʋa, ta nɛɛbɛ vai ɠa é ga, é naa ná-deveiti so, é ziɛ la. 
Mavofodai ɠa ɠɛ ga zɛbɛsu nu eteai zu. Tuya ɠa ɠɛ telebo nui mavofodai ma. 
Toɠa ɓɔɠɔ zɔlɔɔ, naavoloi ɠɛ ná-pɛlɛi wu, ná-telebodai ɠa yɛsu ná ɠɔ. 
Siɛgi zu fai pɛ suɓidizu la, wozakalagi ɠa ɗa ɠula sɔle nui ʋɛ. Telebogɛ, nuɓɔɠɔai, é ga maawɔinɠaa nu. 
Pagɛ ga nui nuɓɔɠɔlai ɠɛ, é kuyei ʋɛɛ, é ɓɔɠɔ vaiti gaaɠula ba ga sɔledai. 
Mazɔlɔɔ faa nɔpɛ ge la telebo nui ɲiikpiga eyɛsu pɛ, nuiti ta ɠizɛ su eyɛsu ɠɔ. 
É la luaa ziiɠoloɠolo kpɔɛ ɲɔiti ba. Ziilɛiʋɛ, tɔɔzei poluzeiʋɛ Ɠɔoɠɔ GALAGI ʋa. 
Zii la ɓalia, dualua ge la ziimaʋɛ. Gaaɓelagi, toɠa sili nuiti koloɠolo pelei ɠa. 
Toɠa ɗa faanɛɛi ɠɛ ga bɔɔlɔa maanɔɠɔ nuiti bɛ. Ná-telebodai ɠa yɛsu ná ɠɔ, tanɔ ɠa a ɗa la ná-zɛbɛi ta ná-lɛbiyai ma. 
Faa ɲɔu ɠɛ nui a kaana, ziiɠaa ɠa ɗa wana, é ɗa ɲiigai ziɛ ga, é ʋala ná-zobogi ma. Faa ɲɔu ɠɛ nuiti ziimai ɠa ɠoloɠolo. 
