﻿Guyeiti.
108.
Davide ná-guyei. Guyei. 
Ladalai ɠa zìimaʋɛ, ee, GALA! Nà guyei loo, gè è maamusɛ ga zìimaʋɛ pɛ. 
À wuzeɠe, wa ʋe, nà-kɔnigi ta nà-papai! Nà geelaalaosuʋɛ maaloɠa. 
Nà è maamusɛ ziiti pɛ saama, ee, Ɠɔoɠɔ GALAGI. Nà guyei loo è ʋɛ zii ɠiligiti saama. 
Mazɔlɔɔ ɗa-nuɓɔɠɔlai ɓudɛʋɛ geeɠɔlɔgi maazu, ta ɗa-wooɠɛɠiladai tonaɓiingiti maazu. 
Ee, GALA, è wɔɔlɔ ʋelei lɛ geeɠɔlɔgi maazuʋɛ! Ɗa-lɛbiyai volo eteai zu ná pɛ, 
naa ɠa a kɛ, niiti è ti nɛai ʋɛ, naati ti unmɔɔ. Kizogi wo ga è-yeezai, gòoɠaaʋote. 
GALA ge ɓɔɛni seizu ɲadegai, é ɠɛ ma: «Pilɛ sɔlɔɔ nui ɠa é ga ze! Nà Sikɛme ɠaaɠwɛ su, gè Sukɔte nɛmɛi ɠaaɠwɛ. 
Galaade ɠa ga nɔ̀nɔ, Manasé ɠa ga nɔ̀nɔ, Efelayime ɠa ga kɔɔɠɔ wɔɔlɔgi ùnba, Zuda ɠa ga nà-masa tukpɔi. 
Moaɓe ɠa ga kokoi, nii gè maagbazu su, nà-saʋala pilisuʋɛ ɠa ga Edɔme yooi. Nà pilɛ sɔlɔɔ kpeei loozu Filisiti nuiti ta-yooi laalɔɠɔma.» 
Ɓɛ ɠa a li ga ze taa wolai zu, nii siɠigi ma? Ɓɛ ɠa a li ga ze Edɔme? 
Ee, GALA, ɗa laade ɓaa, è ɠɛa ɠɛlɛni gi ʋa? Ee, GALA, siɛgi zu gá-ɠɔɔɠɔ nuiti ti ɠɛni ɠulazu la, è la mɔ ɠɛni ʋilɛsu ti ʋolu. 
Ɓɔ gi ʋa gi zili nuiti daalɔɠɔma, mazɔlɔɔ nuɓusɛiti ta-ɓɔbai ɠa nɔ ga wafuun faa. 
Ni GALA ka ade ʋa, ada pilɛ sɔlɔɔ, mazɔlɔɔ tɔ ɠa é ade zili nuiti dɛɛvɛzu. 
