﻿Guyeiti.
103.
Davide ná-guyei. Nà-nuɓusɛlai pɛ ge Ɠɔoɠɔ GALAGI maamusɛ! Kɛ̀ʋelei pɛ ge daasei ɲadegai mama! 
Nà-nuɓusɛlai pɛ ge Ɠɔoɠɔ GALAGI maamusɛ, gè la yeemaa ná-faanɛɛi gila kpalaa ma. 
Mazɔlɔɔ tɔ ɠa é nà-faaɠaaza golaiti kpein suvaayɛsu, tɔ ɠa é nà-seeɓɛiti kpein kɛdɛsu, 
é kìzoga kabayeɠei ma, é ná-wooɠɛɠiladai ta ná-maawɔinɠai ɠɛ ùnba ga bɔɔlɔgi, 
toɠa nà-eteai laave ga undaanɛɛiti kpein, é nìinɛ eɠɛ koɠɛi. 
Ɠɔoɠɔ GALAGI ɠa ɗa faaɠaaza faiti sala, é sɔle fai ɠɛ naati bɛ, niiti nuiti ti ti nimizazu. 
É ná-peleiti dɛɛni ga Moize, é ná-faa wolaiti dɛɛni ga Izilayɛle nuɓusɛiti. 
Ɠɔoɠɔ GALAGI ɠa é zaalai veezu, é ɠɛ ga maawɔinɠaa ƓALAGI, zii la ɠula fala, kpɛtɛai wooɠɛɠiladai zu. 
É la ɗa ga zelii loga yeenɔpɛ, é la ɗa ga faawana makɛga ziimaʋɛ eyɛsu ɠɔ. 
É la de zosu ga da-ɠotoiti kɛʋele, é la de zalazu ga da-vaaɠaaza golaiti kɛʋele. 
Ʋele geeɠɔlɔgi maaɠooza la zooi ʋa, é zɛlɛni maazu, zekana ná-wooɠɛɠiladai wɔɔlɔai la naati bɛ, niiti ti luazu ba. 
Ʋelei folo ɠulazu maaɠoozaai la folo liizuʋɛ ʋa, pele ɠana é da-lɔ koloɠologiti maaɠoozazu la de ʋa. 
Ʋelei doun kɛɛɠɛi ná-dointi nɛai la bɛ, Ɠɔoɠɔ GALAGI naati nɛɛʋɛ ʋɛ ɠana nɔ, niiti ti luazu ba. 
Mazɔlɔɔ é kwɛɛ, nii de ɓɛtɛai la, ki ka su ga da ga fufiligi. 
Nui! Ná-eteai ʋokɔɠɔgɛ tufai ma, nii é ʋuazu dɔɓɔi zu. 
Siɛgi zu fiilɛi ʋuuzu la ma, é ɲɛɛlɛa, adaʋɛ é ɠɛni ná, miná la mɔ faa ɠwɛɛ ná-fai zu. 
Kɛlɛ Ɠɔoɠɔ GALAGI ná-wooɠɛɠiladai la valiboga ɠɔoɠɔ, naati bɛ, niiti ti luazu ba, ná-telebodai ɠa ná, naati ti-lounlointi bɛ. 
Toɠa ga naati tɔnɔ, niiti ti ziɛzu ga ná-minazeɠe gooiti, ti ɠizɛ ná-deveiti su, ti ziɛ ga tiye. 
Ɠɔoɠɔ GALAGI ná-masa kpɔkpɔgi ɠa zeini geeɠɔlɔgi zu, toɠa masadai ɠɛɛzu anii pɛ unda. 
À Ɠɔoɠɔ GALAGI mama, wɔi wo ga ná-geezuɠeelaiti, wɔi wo zulogai zobogi zu, wo ɠolozu daawooi ʋɛ, nii é bosu wo ɗa kɛ! 
À Ɠɔoɠɔ GALAGI mama, wɔi wo ga geezu ɠɔɔɓɔgi, wɔi wo ná-botii ma, wo ziima vaiti kɛɛzu! 
À Ɠɔoɠɔ GALAGI mama, ná-kpɛtɛaniiti kpein, ʋɛ kpein nɔ é masadai ɠɛɛzu ná! Nà-nuɓusɛlai pɛ ge Ɠɔoɠɔ GALAGI maamusɛ! 
