﻿Guyeiti.
102.
Maawɔin nui ná-GALA falii, siɛgi zu suvikɛi ɓegai la, é ɗa ná-kpalai lɛ ga Ɠɔoɠɔ GALAGI. 
Ee, Ɠɔoɠɔ GALAGI, woilo nà-maanɛɛnɛ wooi ma, nà-kpee wooiti ti zeeli è ma! 
Mina ɠaazulɔɔɠu bà, nà-kidaaʋili foloi! Woilo gòoi ma, voloi nà kpee loo la! Suvilɛ ga gòoɠaaʋotega! 
Mazɔlɔɔ nà-eteai ɠa ɲɛɛlɛzu eɠɛ duului, abui ɠa mà ɠaeiti ba, eɠɛ abulekai. 
Kɛɛʋɛ eɠɛ tufai teʋeai ga, é la foloi ɠa, zekana zìi vɔai la. Nà yeemazu nà-daami wo fai ma. 
Gè yɛga kpalagi wosu, kɔ̀lɔgi ɠataga mà ɠaeiti ba. 
Gè ɠɛa eɠɛ teʋebai zu ɠoɠɛi, gè ɠɛ eɠɛ buungi, nii é zeini ada zuɠoloɠologaiti su. 
Nà ɠaazuɓaazu, eɠɛ wɔni goi, nii tɔ ɠila ge zeini pɛlɛ ɠɔmaʋɛ. 
Foloi pɛ daawu, sìli nuiti ta ɓaaɠulazu mà, ti ɗa ɲɛɛɠula nɔ̀un su, ti ɗa zɔiti foovo ga ti maanɔɠɔ ga kɛ̀ʋele. 
Zuʋui ɠa é ga dàamianigi, ɓului ʋotogi zu. Nà nà-kpɔɔle ɗɛi zupuzu ga gàazuɗɛi, 
ɗa-yiimaleʋei maaʋele ma, ta ɗa-yiiɠulagi, mazɔlɔɔ è sòga, è pìli ya. 
Sìi ma voloiti maa ɠa yeizu eɠɛ kpɔkɔmaʋɛ niinigi, gè ɠɛa eɠɛ tufai é vɔɔzu. 
Kɛlɛ ɗɔun ɗa, Ɠɔoɠɔ GALAGI, ɗa masadai ɠɛɛzu eyɛsu ɠɔ, è-lɔɠɔi ɠa yɛsu ná, yeeɠɛɠalaiti pɛ su. 
Ɗa wuzeɠe, è Siyɔn maawɔinɠa, mazɔlɔɔ yeeɠɛɠalai soloogai ga è zaalai la ma la, yeeɠɛɠalai teʋeai ba, naa zeelia. 
Mazɔlɔɔ gɛi gi ga ɗa-wotiɠɛ nuiti, ná-kɔtuiti nɛɛʋɛ gi ʋɛ, ma vufiligi maawɔin ɠa gi zosu. 
Zii ɠiligiti ta Ɠɔoɠɔ GALAGI lɛbi, eteai zu masagiti kpein ta ná-lɛbiyai ɠwɛɛ, 
siɛgi zu Ɠɔoɠɔ GALAGI Siyɔn losu da ʋolu, é ɗa ɓɔɠɔ lɛ náʋɛ ná-lɛbiyai zu. 
Niiti ti maawɔinɗai, é la naati ta-maanɛɛnɛ wooi ʋɛlɛʋiliga, é la ɠɛlɛa ta-ƓALA falii ʋa. 
Naama vaiti ti zɛʋɛ, é makɛ yeeɠɛɠalai ma nuiti tuɠɔ ti ʋaazu, nuɓusɛiti ti ʋaazu ɓɛtɛzu, naati ta Ɠɔoɠɔ GALAGI maamusɛ. 
Ɠɔoɠɔ GALAGI yɛni zeini seizu ɲadegai ungaʋɛ, é wɛlɛ buu ʋelei, é yɛni geezuʋɛ, é ɠaazulo eteai ʋa, 
é kasoɠa nuiti kpala gooiti mɛnini, é ʋa é ti undaaʋili galui vie ti ma, ti mina za, 
naa ɠa a kɛ, nuiti ti Ɠɔoɠɔ GALAGI maawoo ziɛ Siyɔn, ta ná-maamusɛ wooi wo Zeluzalɛme, 
siɛgi zu nuɓusɛiti ti ɠaalɛɛzu ba la náʋɛ, ta masadaiti ta nɔkɔ Ɠɔoɠɔ GALAGI wu ná. 
É sɛ̀bɛi zuɠoloɠologa pele zu, é sìi leʋea kpasu. 
Naa ɠa é ba, gè kpeei loozu la, gè ɠɛ ma: «Nà-GALAGI, mina pàa, nà-eteai zaama, ɗɛi è ná, yeeɠɛɠalaiti pɛ su! 
Kaite è eteai lɔɔɓadɔni, geeɠɔlɔgi ɠa ga è-yeei ná-kpɛtɛanii. 
Ta ɲɛɛlɛ, kɛlɛ ɗɔun ɗa ná eyɛsu ɠɔ. Ti pɛ ta wɔlɔzaɠa eɠɛ seɠei, è ti maavalibo, eɠɛʋelei nu a ɗa seɠei maavalibo da, ta ɲɛɛlɛ. 
Kɛlɛ ɗɔun, ɗa yɛsu ɠɛʋele ma, ɗa-ɠonagiti ti la ɓega ɠɔ! 
Ɗa-wotiɠɛ nuiti ti-lointi ta zeizu zɔlɔɔ, ɗa ɠaazuyɛ ti-mavofodaiti ba, ti zei kpaan.» 
