﻿Guyeiti.
101.
Davide ná-guyei. Nà wooɠɛɠiladai ta telebodai ma wuyei loozu, nà naa ɠɛɛzu è lɛbi vai ma ga guyei, ee, Ɠɔoɠɔ GALAGI! 
Nà ʋilɛ sɔle nuiti ta-ʋelei ma. Yeelɛ ɠa è ʋaazu la pɔ̀ bɛ? Nà ziɛ ga zii ʋagɔlai nà-pɛlɛi wu. 
Gè la ʋɔɔpɛa faa ɲɔu ɠɛɛ vaa nɔpɛ ba. Kidaaleʋelala luʋai maayo ge la nɔ̀un bɛ, gè la yeezeiɗa naa tanɔpɛ bu. 
Yaava ɠisiɛi maaɠooza nɔ̀un ba, gè la faa ɲɔu ɠwɛɛga. 
Nui é vaazu seiɲɔɠɔi ma dɔɔɠuzu, nà daaɠulu, nui nii gaazulɛai, ziimaʋɛ laavegai ga wasogi, gè la yeezeiɗa naa wu. 
Nà ɠaazulo sɔle nuiti ba, ti zooi zu, gè ti zei ɠoba. Niiti ti ziɛzu ga sɔle nuiti kɛʋele, naati ta ɠɛ nà-botii zu. 
Yaava nu la zeizu zɔlɔɔga nà-pɛlɛi wu, zɔi é ga zɛɛ wo nui, naa la losu zɔlɔɔga gàazu. 
Sobu-o-sobu, nà faa ɲɔu ɠɛ nuiti daaɠulu ti zooi zu, naa ɠa a kɛ, gè ti ɓeteʋe Ɠɔoɠɔ GALAGI ná-taai ʋa, tɛiti kpein ti telebotala vai ɠɛɛzu. 
