﻿Guyeiti.
99.
Ɠɔoɠɔ GALAGI ɠa masadai ɠɛɛzu, nuɓusɛiti sasu ɠa ɓalizu. Toɠa ná-masa kpɔkpɔgi zeini seeluɓɛinti unda, zooi ɠa ɲiikpisu. 
Ɠɔoɠɔ GALAGI wɔɔlɔʋɛ Siyɔn, buzeɠeʋɛ gola, é zei nuɓusɛiti kpein unda. 
Nuɓusɛiti pɛ ti maamusɛ, tɔ ɠa é ga GALA golai, maayikiai, mazɔlɔɔ ɲadegɛ! 
Ti è-zɛbɛi maamusɛ, masagi nii telebodai nɛai bɛ! Ungo, ɗa ɠa è sɔle faiti seiɗai kpasu, è telebogi ta faa zɔlegai zei Izilayɛle zaama. 
À ada-ƓALAGI, Ɠɔoɠɔ GALAGI ná-bɔɔlɔlai ɠula kɛlɛma, à nɔkɔ bu, ná-kɔɠɔloma anii ɠakala, mazɔlɔɔ ɲadegɛ! 
Moize ta Aalɔn, ti ɠɛni ga ná-zalaɠa ɠula nuiti, Samiyɛle ɠɛni naati saama, niiti ti ɠɛni wooɠulazu ma, ti wooɠulani Ɠɔoɠɔ GALAGI ma, é ti wooɠaaʋoteni. 
É yɛni tonaɓiingi zu, é ɓɔɛ ti ʋɔ, ti ná-tɔgiti soni ta ná-deveiti, niiti é ti veeni ti ya. 
Ee, Ɠɔoɠɔ GALAGI, gá-ƓALAGI, ɗa ɠa è ti wooɠaaʋoteni, è ɠɛ ti ʋɛ ga maavaayɛ bo GALAGI, kɛlɛ è ti loɠani ta-vaa ɲɔiti faa zu. 
À Ɠɔoɠɔ GALAGI ná-bɔɔlɔlai ɠula kɛlɛma, ada-ƓALAGI, à nɔkɔ bu, ná-gize ɲadegai ma! Mazɔlɔɔ ɲadegɛ, Ɠɔoɠɔ GALAGI, da-ƓALAGI! 
