﻿Guyeiti.
98.
Guyei. À guye niinɛi loo Ɠɔoɠɔ GALAGI ʋɛ, mazɔlɔɔ é laavɔɔ vaiti kɛɛni. É kizogi woni ga ná-zobogi, ta ná-gaaɓaa ɲadegai. 
Ɠɔoɠɔ GALAGI ɠa ná-kizo fai lɛɛzu, é ná-telebodai lɛ ga zii ɠiligiti. 
É ɠizɛni ná-nuɓɔɠɔlai zu, ta ná-wooɠɛɠiladai Izilayɛle ná-pɛlɛyeɠei ʋɛ. Eteai ɠwɛgi kpein ge ada-ƓALAGI ná-kizo fai ɠaani. 
Eteai zu nuɓusɛiti kpein à wooɠula ga koozunɛɛi Ɠɔoɠɔ GALAGI ʋɛ, wa-ɠoozunɛɛi zu, à guyei loo. 
À Ɠɔoɠɔ GALAGI maamusɛ ga papai wooi, à naa ɠɛ papai wooi ʋɔ, ta guye wooiti. 
À maamusɛ ga puʋu gooi, ta baala minɛ ʋuʋugi wooi, à ɠoozunɛ Ɠɔoɠɔ GALAGI ɠakala, nii é ga Masagi! 
Kpoloɗɛi zikɔ, ta bu aniiti kpein, eteai ta su aniiti kpein ɓalaa. 
Ziɛ wolaiti ti yealoɠa, gizeiti ti ɓɔsu, ti guyei loo ga koozunɛɛi 
Ɠɔoɠɔ GALAGI ɠakala, mazɔlɔɔ toɠa ʋaazu é eteai lukpɔɠaaleʋe. Toɠa eteai lukpɔɠaaleʋe ga telebodai, ta nuɓusɛiti ga sɔledai. 
