﻿Guyeiti.
97.
Ɠɔoɠɔ GALAGI ɠa masadai ɠɛɛzu! Eteai ɠoozunɛ, ziɛ zaama yooiti ti ɠoozunɛ! 
Tonaɓiingiti ta kpidii ti ɠooliʋɛ ma. Telebodai ta sɔledaiti ka ti ga ná-masa kpɔkpɔgi ʋoluzeigi. 
Abui ɠa ziɛzu kakalaʋɛ, naa ɠa é sili nuiti galazu maaɠoolii zu. 
Ná-mainmainti ta eteai zuɠalasu, eteai kaani, é ɓali ga duai. 
Gizeiti gaa ɠa wuunsu eɠɛ kedoi, Ɠɔoɠɔ GALAGI ɠakala, eteai kpein Maliɠii ɠakala. 
Geeɠɔlɔgiti ta ná-telebodai lɛɛzu, nuɓusɛiti pɛ ta ná-lɛbiyai ɠa. 
Ta ɠɛ unfegi zu, niiti kpein ti nɔkɔsu vololibaiti bu, niiti ti wasosu zɛɛ ɠalagiti ta-vaa zu, ti ti ya. Wɔiti wo ga gala kiligiti kpein, à nɔkɔ Maliɠii wu! 
Ma wooi ɠa mɛni Siyɔn, ti ɠoozunɛ, Zuda laaiti kpein ta ɠɛ koozunɛɛi zu, tɔɔzei ɗa-lukpɔɠaaleʋeiti ba, ee, Ɠɔoɠɔ GALAGI! 
Mazɔlɔɔ, Ɠɔoɠɔ GALAGI, ɗa ɠa è Anii-Pɛ-Unda eteai kpein maazu, è-yee ɠa gala kiligiti kpein maazu. 
Wɔiti Ɠɔoɠɔ GALAGI nɛai wo ʋɛ, à faa ɲɔi wɔinzeɠe! Toɠa naati zɛnvui makɛsu, niiti ti ga wooɠɛɠila nuiti bɛ, toɠa ti unmɔɔ, é ti ɠula faa ɲɔu ɠɛ nuiti zea. 
Wozakalagi vazagɛ telebo nui ʋɛ, ta koozunɛɛi naati bɛ, niiti ti-yii zɔlegai. 
Telebo nuiti, à ɠoozunɛ Ɠɔoɠɔ GALAGI ná-faa zu, wo daasei ɲadegai maamusɛ. 
