﻿Guyeiti.
88.
Kolé mavofodaiti ta-wuyei. Guye loo ɠundiɠii nɔnɔi ʋe. Nii é loozu koolei bu. Ezela nui Ɠeman ná-kidafaawui. 
Ɠɔoɠɔ GALAGI, nà-kizo GALAGI! Nà kpeei loozu foloi ta kpidii è ɠaazu. 
Nà-maanɛɛnɛ wooi lɛ, é zeeli è ma. Woilo nà-kpee wooi ma. 
Ungo, maanɔɠɔi kula ɠɛa ga ze, gè maaɓuɠa saai ʋa gola. 
Nɔ̀un gàalugɛ niina naati saama, niiti ti yeizu kabayeɠei zu, gè ɠɛa eɠɛ zunui, nii zɛbɛ nɔpɛ ge la mɔ ba. 
Nà niina laani gɔvɛiti saama, eɠɛ poomaiti ti laani kabayeɠei zu. È yeemaai ti ma, è-ɠi ge la mɔ ti zu, è la mɔ faa nɔpɛ kɛɛzu ti ʋɛ. 
È dɔ̀a zeɠei ɓomaʋɛ, saai ɓomaʋɛ ma ɓidii zu. 
Ɗa-yiiɠulagi zeelia mà, ɗa-yiiɠaawanai zeelia mà eɠɛ ziɛ lakpatakpagiti. 
È màaɠooza sìɛɲɔɠɔiti ba, gè ɠɛa ti ʋɛ eɠɛ maalua ani, nà-maanɔɠɔi daaɠuluga mà, gè la zooga gè ʋa ɠula su. 
Gàazuɠɛzɛi ɓɔiɗa su ga ziizoolɛi. Ee, Ɠɔoɠɔ GALAGI, nà wooɠulazu è ma, yeenɔpɛ! Nà zèeiti tɛɛzu è ma. 
Gɔvɛiti ka ɗa laavɔɔ vaiti kɛ ti ʋɛ? Gɔvɛiti ka ta wuzeɠe, ti ɗa è lɛbi? 
Ɗa-nuɓɔɠɔlai ɠa wo nɛi kabayeɠei zu, ta ɗa-wooɠɛɠiladai undaaʋili zeɠezaɠai zu? 
Ɗa-laavɔɔ vaiti kwɛɛgɛ nɛi kpidii zu, ta ɗa-lelebodai zooi zu, ʋɛ zeemai wogai ná ma? 
Nɔ̀un nà, ee, Ɠɔoɠɔ GALAGI, ɗa ɠa gè è lolisu ga è ɓɔ bà. Nà nà-maanɛɛnɛ wooi laazeelizu è ma, sobu-o-sobu. 
Leeni vaa zu, ee, Ɠɔoɠɔ GALAGI, è pìlisu ya? Leeni vaa zu è ɠaazulɔɔɠuzu ga è mina kà? 
Mazɔlɔɔ màawɔinʋɛ, nà niina saai ɠoba, é tɔɔzei nà-doungo ziɛgi zu ma, eyɛsu niizu, nà lɔɔzu maalua vai zu, nii è seizu mà, sàsuɓalia gola. 
Ɗa-yiiɠaawana abui soga nɔ̀un ba, gè ɠoloɠologa ga ziizoolɛi, nii é zeelizu mà, é zeɠe è ʋɔ bɛ. 
Eɠɛ ziɛiti ti màaɓɔlesu folo-o-folo, ta latisu mà mini-o-mini. 
È gàazuɠwɛɛgiti ta bɔ̀ɔlaiti maaɠooza bà. Kpidii ɠila kpe nɔ ɠa é ga sìɛpoluɲɔɠɔi niina. 
