﻿Guyeiti.
85.
Guye loo ɠundiɠii nɔnɔi ʋe. Kolé mavofodaiti ta-wuyei. 
Ɠɔoɠɔ GALAGI, è undaanɛ vaa ɠɛɛni ɗa-yooi ʋɛ. È Zakɔɓe mavofodai zei ʋele ɓɛtɛni ʋolu. 
È ɗa-nuɓusɛiti ta-vaaɠaaza golaiti seɠeni ti unma, è ta-ɠotoiti kpein suvaayɛni. 
È ɗa-yiiɠaawana vai zeɠeni ga, è yeeɓeni ɗa-yiimaleʋei ʋa. 
Gi zei ʋele ɓɛtɛ ʋolu, ee, GALA, gi ɠizo nui! Ɓe yiiɠaawanazu gi ma! 
Ɗa yɛsu yiiɠaawanazu gi ma, eyɛsu ɠɔ ɓaa? Ɗa-yiiɠaawanai la ɓesu ɠɔ, eyɛsu yeeɠɛɠalaiti pɛ su? 
È la kɛa, è ʋa zɛnvui ve gi ya ʋolu ɓaa, nii a kɛ ɗa-nuɓusɛiti gi ɠoozunɛ è ʋɔ? 
Ee, Ɠɔoɠɔ GALAGI, ɗa-wooɠɛɠiladai lɛ ga giye! Ɗa-ɠizo fai ve gi ʋɛ. 
Nà pɔ gè woilo naa ma, nii GALA ge bosu, Ɠɔoɠɔ GALAGI. Mazɔlɔɔ toɠa ziilɛi kpɔɛi wosu ná-nuɓusɛiti ma, ta niiti ti bɛ ga wooɠɛɠila nuiti. Kɛlɛ ti mina ɠale ma mɔnɔ tooya vaiti ma. 
Ungo, nágo ʋe na, è ʋa naati kizo, niiti ti luazu ba, naa ɠa a kɛ, lɛbiyai zei gá-yooi zu. 
Wooɠɛɠiladai ta gaamai ta ɠomi, telebodai ta ziilɛigi ta yeezo. 
Gaamai ɠa ʋɔnɔ zooi ʋa, telebodai ɠa yei, é zeɠe geezuʋɛ. 
Ɠɔoɠɔ GALAGI ɓɔɠɔi ɠa undaanɛɛi ve, gá-yooi ɠa kulanumai ve. 
Telebogi ɠa ziɛ tɔun kakalaʋɛ, é pelei la tuɠɔ. 
