﻿Guyeiti.
84.
Guye loo ɠundiɠii nɔnɔi ʋe. É loozu kɔnigi ɠa, nii é zeɠezu Gate taazuʋɛ. Kolé mavofodaiti ta-wuyei. 
Ee, Ɠɔoɠɔ GALAGI, Fai-Pɛ-Maliɠii, è-zeizuʋɛ nɛɛʋɛ bɛ̀ gola! 
Nà ɓalasu, zìi ɗa zoolɛ, ɗa-ɠoi ma vaa zu, Ɠɔoɠɔ GALAGI, nà wooɠula ga koozunɛɛi zɛnvu su ƓALAGI ʋɛ. 
Soologi ɠa laɠagi losu zɔlɔɔsu, sɛʋɛzɛʋɛgoi laɠagi losu zɔlɔɔ, ʋɛ é ma yiʋoiti puuzu ná, ɗa-zalaɠa ɠulazuʋɛti kobaʋɛ, Ɠɔoɠɔ GALAGI, Fai-Pɛ-Maliɠii, nà-masagi, nà-GALAGI. 
Undaanɛ nu ɠa ga naati, niiti ti zeizu ɗa-ʋɛlɛi wu, mazɔlɔɔ ta yɛ è maamusɛzu eyɛsu ɠɔ. 
Undaanɛ nu ɠa ga naati, niiti è ga ti-zɛbɛi, pelei ɠa ti-yiimaʋɛ, ta ziɛ la, ti li ɗa-ʋɛlɛi wu. 
Siɛgi zu ti leʋesu da Ɓaka nɛmɛi zu (nii poluʋɛ ga «gɔlɔ nɛmɛi zu»), GALA ka falibo, é kɛ ga koozunɛ adaʋɛ, tona mɔungiti ta ʋu naa ma, ga tuyai. 
Ti-zuvikɛi ɠa li ga wɔɔlɔa, ta ɓɔɠɔ lɛ ga GALA Siyɔn. 
Ɠɔoɠɔ GALAGI, Fai-Pɛ-Maliɠii, woilo nà-maanɛɛnɛ wooi ma! Woilo, Zakɔɓe ná-GALAGI! 
Ee, GALA, ɗɛi è gi makɛsu, yeezei naa wu ga pagɔ, nii è gulɔi ziaai ma, è sei. 
Mazɔlɔɔ nu folo ɠila kɛ ɗa-ɠoizuʋɛ, naa zoloogɛ é leʋe folo waagilagi (1.000) ʋa nu a kɛ ada ɠili. Fizɔgɛ nu yɛ nà-GALAGI ná-pɛlɛlaʋɛ, é ʋa li yɛsu faa ɲɔu ɠɛ nuiti ta-ʋɛlɛi wu. 
Mazɔlɔɔ Ɠɔoɠɔ GALAGI ɠa gi ʋɛ eɠɛ foloi, ta kɔɔɠɔ zɛpɛgi, Ɠɔoɠɔ GALAGI ɠa zaalai veezu ta lɛbiyai, é la ɠɛlɛa undaanɛɛ veezu naati bɛ, niiti ti ziɛzu sɔledai zu. 
Ɠɔoɠɔ GALAGI, Fai-Pɛ-Maliɠii, undaanɛ nu ɠa ga naama nui, nii é ɠalivaazu è ma! 
