﻿Guyeiti.
81.
Guye loo ɠundiɠii nɔnɔi ʋe. É loozu kɔnigi ɠa, nii é zeɠezu Gate taazuʋɛ. Azafe ná-guyei. 
À guyei loo ga koozunɛɛi GALA bɛ, tɔ ɠa é ga de-zɛbɛi! À wooɠula ga koozunɛɛi Zakɔɓe ná-GALAGI ʋɛ! 
À guyei loo ʋɔɔma, wo tamadegi ɠɛin, wo kɔnigi ɠɛin gooloo ma, wo papai ɠɛin! 
À puʋugi vɛ alu toga niinɛi ma, ta à zeina gize la, ada-vɛti volo wolai! 
Mazɔlɔɔ toɠa ga tɔgi Izilayɛle ʋɛ, Zakɔɓe ná-GALAGI ná-devei ʋe. 
Tɔgi ʋe, GALA ge seini Zozɛfe ná-pɛlɛyeɠei ma, siɛgi zu é laalɛɛni la Ezipete yooi wu. Nà wooi ta mɛnisu, nii gè la kwɛɛ, é ɠɛɛzu ma: 
«Gè kasɔi zeɠea wo ɠɔma, wo-yeeiti ti viega, ti ɓe kpɔlɔgiti ba. 
Siɛgi zu wo ɠɛni la kidaaʋiligi zu, wo tòlini, gè ʋaani, gè wo unmɔɔ, gè wo wooɠaaʋoteni tonavifigi zu, gè wo ʋoluɠulani Meliɓa ɗɛi ɠobaʋɛ. 
«Nà-nuɓusɛiti, à woilo gòo ma, nà wo lɛnɛsu. Ee, ni nɔ wo ɠɛni woilosu gòo ma, Izilayɛle! 
Gala kili ge mina ɠɛ wo yeema, à mina nɔkɔ gala kiligiti taɠila kpalaa bu! 
Nà ga Ɠɔoɠɔ GALAGI, wa-ƓALAGI, nii é wo ɠulani Ezipete yooi zu. À laalao gola, nà ti laave. 
Kɛlɛ nà-nuɓusɛiti ti la woiloni gòo ma, Izilayɛle la nɔ̀un pɔ. 
Gè ti yɛgɛ ti yiima vaiti polu, ti ʋilɛgɛ ti ɓɔɠɔyiima vaiti nɔ ʋolu. 
Ni nɔ nà-nuɓusɛiti ta woilo gòo ma, ni Izilayɛle ɠa ziɛ ga pelei gè dɛɛzu la, 
gaamago nɔ, nà ti zili nuiti da ti ɠɔɠɔwu, nà ti nimiza nuiti doɠa. 
Niiti ti Ɠɔoɠɔ GALAGI wɔinzeɠezu, naati ta lɛbiyai ve tɔun bɛ, naa ɠa deveai ti ma eyɛsu ɠɔ. 
Nà Izilayɛle ɠɔnɔkula ga molo ʋagɔi, gè dɔɓɔ ɠɔingi ma wulɔi ve ti ya, ti yiɠo la.» 
