﻿Guyeiti.
76.
Guyei loo ɠundiɠii nɔnɔi ʋe. É loozu ga kɔnigiti. Azafe ná-guyei. Guyei. 
GALA ge ɓɔɠɔ lɛɛni Zuda yooi zu, daaseigi wɔɔlɔʋɛ Izilayɛle yooi zu. 
Ná-seɠe ʋɛlɛi ɠa Salɛme, seizuʋɛ ɠɛ Siyɔn. 
Miná ɠa é kɔɔɠɔ zɔɔlaiti galeɠaleni ná, mɛɛinti, ta kɔɔɠɔ zɛpɛgiti, ta boɠa zɔkpɔiti. 
Ee, GALA, ɗa volozu, è maayiki, é leʋe gizeiti ba, ʋɛti è è zili nuiti koloɠoloni ná. 
Ti salaʋusu ɠɛzɛɠɛzɛgiti maavooni, ti loa bu ɲiimɛnii zu, ta-ɲiimɛni ɠaaɓelagi. Naama ɠɔɔɠɔ nu ɠɛzɛɠɛzɛgiti, ti la zooni ti ʋa ɓɔɠɔ maalobo. 
Zakɔɓe ná-GALAGI, siɛgi zu è zelii loni da ti ma, kɔɔɠɔ wotoloiti kpizɛ nuiti ta sooiti ti naʋalani. 
È maayikiʋɛ! Ɓɛ ɠa a zoo losu è ɠakala, ɗa-yiiɠaawanai ʋa ziɛgi zu? 
È yɛni geeɠɔlɔgi ungaʋɛ, è ɗa-lukpɔɠaaleʋe vai lɛ, eteai ɠaaluani, é zei kpɛ, 
siɛgi zu, ee, GALA, è wuzeɠeni la, è faawogi wo, è ʋa ga kizogi naati kpein pɔ, niiti ti maawɔinɗai eteai zu. 
Anɛɛ nuɓusɛiti ta-yiiɠulagi ɠa ɗa valibo, é ɠɛ ga maamusɛ vai è ʋɛ, niiti ɗa-yiiɠulagi ʋoolazu ti ʋa, naati ta fɛtii ɠula ɗɔun è ʋɛ. 
À minazeɠegiti bo Ɠɔoɠɔ GALAGI wa-ƓALAGI ʋɛ, wo ti laazeeli. Niiti kpein ti maaɠoolii zu, naati ti ʋa ga vebɛaniiti maayiki ƓALAGI ʋɔ bɛ. 
Mazɔlɔɔ toɠa kundiɠiiti ta-waso fiilɛi ɠula ti zu, maayikiʋɛ, etea masagiti zea. 
