﻿Guyeiti.
75.
Guye loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Mina koloɠolo!» Azafe ná-guyei. Guyei. 
Gá è maamusɛzu, ee, GALA! Gá è maamusɛzu. Gá zezezu ga è-lɔɠɔi. Ɛsɛ pɛ ka ɗa-ɠɛɛwoti maayikiaiti ta-vaa wosu. 
Ɠɔoɠɔ GALAGI ɠɛ ma: «Siɛgi gè teʋeai ba, naa a zeelina, nà tukpɔi ɠaaleʋe ga sɔledai. 
Eteai ɠa ɲiikpi, ta nii kpein é zeini su, nà ɠa nà zɛ loni kpaan kpɛdɛgiti ga. 
«Nà bosu naati ma, niiti ti wasosu ga: ‹À mina waso pa!› Gè ɠɛ faa ɲɔu ɠɛ nuiti ma: ‹À mina loʋalaʋɛ wuzeɠe! 
À mina gaazulɛ ɠula ga GALA! À ɓe ɠɔgi losu ga, wo ʋa ɗa gaazulɛɛ ɓɔɛiti bo!› » 
À suɠwɛɛ ga nui ná-bɔɔlɔlai la zeɠezu folo ɠulazu ʋelei, ɓaa folo liizu ʋelei, ɓaa teʋebai zu. 
Mazɔlɔɔ GALA ka é tukpɔi ɠaaleʋezu, toɠa ta wuzeɠe, é ta ɠaayei. 
Ziawɔi ɠa zoni Ɠɔoɠɔ GALAGI ya, daavegai ga ná-ziiɠaawana lɔɔi, nii sɔgai é zupu. Toɠa puuzu faa ɲɔu ɠɛ nuiti bɛ eteai zu, ta kpɔle, ti ziawɔi naa zuwo eyɛsu é zeeli kpogi zu. 
Nɔ̀un nà, gè la looɠoga bo fai ʋa ɠɔ, nà Zakɔɓe ná-GALAGI maamusɛ yeenɔpɛ ga guyei. 
Toɠa faa ɲɔu ɠɛ nuiti ta-wasogi zuɠaleɠale, kɛlɛ tɔun, telebo nui ɠa ɠɛ ziɛzu nɔungi wuzeɠeai. 
