﻿Guyeiti.
73.
Azafe ná-guyei. Ungo, GALA pagɛ Izilayɛle ʋɛ, pagɛ naati bɛ, niiti ti-yiimaʋɛ ɠoleai. 
Anɛɛ naa ʋe, nɔ̀un nà, ná tago nɔ kɔ̀ɠɔiti ti ɠɛnina ɓunɛsu, ná tago nɔ te, gè ʋa loo, 
mazɔlɔɔ gè ɠɛni toloi ɠulazu ga waso nui, gè nu ɲɔiti ta-zɔlɔɔgi ʋɛtɛgai ma. 
Mazɔlɔɔ kpɔlɔ la zeelizu ti ma, eyɛsu ti zaa voloi zeeli, kɛdɛyai ɠa ti ya, ti lɔtɔai. 
Kpɔlɔi nii é zeizu nuɓusɛiti ma, naa tanɔpɛ ge la zeizu ti ma, nimizai nu vuluiti ti sɔlɔɔsu, naa ta la zeizu ti ma. 
Naa ɠa é ba, ta ɓɔɠɔ maaɠilizu ga wasogi, é ɠɛ ti ɠɔbu ga yɔlɔɠɔi, ti maaɠiliʋɛ ga toomai, eɠɛ tookɔbai kɔɠɔgai ti ma. 
Ti-ɠaazuʋɛ ɠa volozu ga ti-ma wulɔi, ti ɠoozu ɠisiɛ ɲɔi ɓela ge la ba. 
Ta ɲɛɛɠulasui ɠɛɛzu, ti ɗa ɓɔɛ ga ɲɔuɗa, nu nimiza vai zu, ta ɓɔɛzu ga gaazulɛɛi. 
Ta laalosu geeɠɔlɔgi ɓɔɠɔi ʋa, ti-laa la leʋesu faa nɔpɛ ba eteai zu. 
Naa ɠa é ba, nuɓusɛiti ta ʋilɛsu ti ʋolu, ti ɓɔɔle ga ti-laawooiti eɠɛ ziɛ, 
ti ɗa ɠɛ ma: «Leeni ɠa GALA ge kwɛɛ? Zɔi é Anii-Pɛ-Unda, naa ɠa kwɛɛ ɠale?» 
Ʋele ɠana faa ɲɔu ɠɛ nuiti ti la, ti yiilɛiɗai yeenɔpɛ nɔ, ti ɗa naavoloi ɠaalɛ ba. 
Deɠɛmu fuun faa ɠa gè kɛɛni ga gè ɓɔɠɔ makɛ ladalai zu, gè ɓɔɠɔ makɛ sɔbalalai zu nɔ fuun. 
Nà kpɔlɔi zɔlɔɔsu folo-o-folo, nà maaɠoloi laawu sobu-o-sobu. 
Kɛlɛ ni gè deveni ga gè ɓɔɛ ga ti ɠɛʋele, nà la ɗa-nuɓusɛiti yaava. 
Gè tɔɔzeini ga ɠigaiziɛ, gè ɠidaani bu, ga gè gaaɠa, é ɠɛni gàazu ga faaɓaa gola. 
Eyɛsu naama voloi, yeei gè lɛɛni la GALA seizu ɲadegai, miná ɠa gè ɠidaanina faa ɲɔu ɠɛ nuiti gaaɓelazuʋɛ wu. 
Gaamazu, ɗa ti ʋilɛsu pele zuɲagiti su, ɗa ti laaʋilisu ti-undaaʋilisuʋɛ. 
Ee, wɛlɛ, yeeɠɛɠala go nɔ laawu, é ɠɛa ga nimizai, ti loa ya, saai ma luabai ti ɠoloɠologa. 
Eɠɛʋelei maaniinigiti ti la, niiti ti ɠaazu segi zu, ɗa wuunna ti ɲɛɛlɛ, ee, Màliɠii, siɛgi zu è wuzeɠezu la, ɗa ti kpein ɲɛɛlɛ. 
Siɛgi zu zìiɠaawanani la gola, gè ɗa ɓɔlɔ zìimaʋɛ, 
gè ɠɛni ga ɠimalala nui, gè ɗa ziɛ è ʋolu, eɠɛ suai nii nɔungi la ná. 
Anɛɛ naa ʋe, nà è ʋa yeenɔpɛ, è sògɛ zèezai ʋa. 
Ɗa losu tùɠɔ è-yiimai zu, naa ʋoluma, ɗa sèɠe, è li ga ze ɗa-lɛbiyai zu. 
Ɓɛ ɠili ka é zèema geeɠɔlɔgi zu? É ɠula ɗɔun è ʋolu, zìima vaa ɠili nɔpɛ ge la ná eteai zu. 
Anɛɛ ni kpùsɛi ɠa ɓɔlɔ, zìi ɓalaa, kɛlɛ GALA ka ga nà-fasai, zìi ʋoluzeiɗai ba, é ɠɛ ga nɔ̀nɔ. 
Mazɔlɔɔ wɛlɛ, niiti ti maaɠoozazu è ʋa, ti undaa ɠa ʋilisu. Ɗa naati pɛ koloɠolo, niiti ti la ga wooɠɛɠila nu è ʋɛ. 
Nɔ̀un nà, nà-undaanɛɛi ɠa é ga gè ɠɛ GALA kobaʋɛ yeenɔpɛ. Ungo, gè dɔɔɠuzu ɠiteɠitegi ɓɛtɛʋɛ, Màliɠii Ɠɔoɠɔ GALAGI ʋɔ bɛ, naa ɠa a kɛ, nii kpein é kɛa, gè ɗa naati bo. 
