﻿Guyeiti.
71.
Ee, Ɠɔoɠɔ GALAGI, ɗa ɠa gè lɔɔɠuzu è ʋoluʋɛ, màkɛ eyɛsu pɛ, gè mina lɔ unfegi zu. 
Ɗa-lelebodai zu, ùnmɔɔ, è fìe! Woilo gòoi ma, è kìzo! 
Ɠɛ bɛ̀ ga fasai, nii é bɛ̀ ga dɔ̀ɔɠuzuʋɛ, è devei veeni zèa, ga gè ʋa ná yeenɔpɛ, nii a kɛ gè ɠizo, mazɔlɔɔ ɗa ɠa è ga nà-fasai ta nà-siɠigi. 
Ee, nà-GALAGI, kìzo nu ɲɔi yeei ma, ta telebotala nui, nii zii ɲɔuɗai. 
Mazɔlɔɔ Màliɠii, Ɠɔoɠɔ GALAGI, ɗa ɠa è ga nà-kitogi! Nà-kitogi ɠa ga ɗe, é zo nà-doungo ziɛgi zu ma, 
kaite dèe ɠoozu gè ʋoluzeini è ʋa, kaipa gè zɔlɔɔni, ɗa makɛsu mà, yeenɔpɛ nà-maamusɛi ma ungi ɠa ga ɗe. 
Nà nui ma mɔinmɔin gaazu ga laavɔɔ anii, dɔɔɠuzu ɠitei ɠa é ga ɗe. 
Dàaʋɛ laave ga ɗa-maamusɛi, folo-o-folo é ɗa ɗa-lɛbiyai ɠula kɛlɛma. 
Mina pìli ya pɔ̀lɔzaɠa siɛgi zu, siɛgi zu sɛ̀bɛiti ti ɠulazu la zèa, mina ɠɛlɛ bà! 
Mazɔlɔɔ nɔ̀un sili nuiti ta sùɠulazu, ta nɔ̀un gaaʋɛɛnɛsu zɛ̀nvui vaa zu, ta ɓɔɠɔ ɠaazu, 
ti ɠɛ ma: «GALA ge ɠɛlɛa ba, à ʋilɛ polu, à so! Nu nɔpɛ ge la fiega.» 
Ee, GALA, mina maaɠooza nɔ̀un ba! Nà-GALAGI, ʋa ga suvilɛ, è ɓɔ bà! 
Ti unfe, ti zuwuɠaaleʋe, niiti ti pèelalazu! Ɓaaɠulamai ta unfegi ti maaɓɔle, tɛiti ti wɔinɗai ga nà-maanɔɠɔ vai! 
Nɔ̀un nà, kìgi logɛ è ʋa yeenɔpɛ. Nà yɛ è lɛbizu yeenɔpɛ nɔ. 
Dàaʋɛ ɠa ɗa-lelebo fai wo, ta ɗa-ɠizo fai folo-o-folo, mazɔlɔɔ gè la ti-liegɔ ɠwɛɛ. 
Nà liizu ga luɠɔʋelei, ɗa-vɔnifaamai ʋɔ, Màliɠii, Ɠɔoɠɔ GALAGI! Nà ɗa-lelebodai ɠila kpe nɔ ɠula kɛlɛma. 
Ee, GALA, è kàlani, é zo nà-doungo ziɛgi zu ma, eyɛsu niizu, nà ɗa-vaa maanɛɛnɛgiti bosu. 
Anɛɛ ɓalaa gè wɔlɔzaɠa pa, nɔ̀ungi ɠole, ee, GALA, mina ɠɛlɛ bà, naa ɠa a kɛ gè è-zɛbɛi ma vaiti bo niima ziɛgi zu nuɓusɛiti ma, gè ɗa-ɠaaɓaai lɛ ga naati kpein, niiti ti ʋaazu. 
Ee, GALA, ɗa-lelebogi ɠwɛ ge la ba, è faa ʋagɔ wolaiti kɛɛni! Ee, GALA, ɓɛ ɠa é ga è ɠɛʋele? 
È ʋoluɠulai zeiʋɛ gi ma, ga kidaaʋiligiti ta maanɔɠɔiti. Kɛlɛ ɗa zɛnvui veezu gi ya ʋolu, ɗa mɛ̀ɛn, è kùla zeɠezaɠai ɓomaʋɛ. 
Ɗa nà-unfemai ve zèa mɔnɔ, è gàanɛɛnɛ mɔnɔ. 
Nɔ̀un, nà lati niina, gè è maamusɛ ga kɔnigi wooi, ɗa-wooɠɛɠiladai maaʋele ma, nà-GALAGI. Nà ɗa-lɛbiyai maamusɛ ga papai, Izilayɛle ná-GALA Ɲadegai! 
Dàkɔlɔgiti ta è maamusɛ, siɛgi zu gè guyei loozu la è lɛbi vai zu, ga zìimaʋɛ pɛ, nɛi è ùnmɔɔgai. 
Folo-o-folo, nɛ̀gi ɠa ɠɛ ɗa-lelebo fai wosu, mazɔlɔɔ ti-ɠigi zupua, ti maaɓɔle ga unfegi, tɛiti wɔin ɠɛni ti ma ga ti màanɔɠɔ. 
