﻿Guyeiti.
69.
Guye loo ɠundiɠii nɔnɔi ʋe. Davide ná-guyei. Nii é loozu é zoloo guye wooi ma, nii daa ga: «Bulɛgi ma ʋuaiti». 
Kìzo, ee, GALA! Ziɛi sòga kɔ̀daʋɛ. 
Gè ɠataga palaʋalai zu, kɔ̀ɠɔ losu nɔpɛ ge la bɛ̀. Wɛlɛ, nɔ̀un gè yeiɗa ziɛi ɓomaʋɛ, ziɛ veinfeingi màaɓɔlega. 
Gè ɓɔlɔa ga kpee looi, kɔ̀da yeɠei ɠaawana, gàazuɠɛzɛiti ti ɓɔlɔa, ga nà-GALAGI maaɓɔun fai. 
Mazɔlɔɔ niiti ti wɔ̀inzeɠezu un ge la ba, naati mɔinʋɛ, ti leʋe ùnma undeɠai liegɔi ʋa. Ti-zɛbɛi wɔɔlɔʋɛ, tɛiti ti pɔ ga ti kòloɠolo, ti ga sìli nuiti un ge la ba, nii gè la unmani, kɛni gè naa ʋotogi ve. 
Ee, GALA, è nà-ɠimalalai ɠwɛɛ, ta nà-kɛɛwoti ɲɔiti ti la lɔɔɠuni è ʋa. 
Niiti ti ɠitogai è ʋa, naati ti mina unfe nɔ̀un maaʋele ma, Ɠɔoɠɔ GALAGI, Fai-Pɛ-Maliɠii! Niiti ti è ɠaiziɛzu, naati ti mina unfe nɔ̀un maaʋele ma, Izilayɛle ná-GALAGI! 
Ɗa-vaa ɠa é kɛɛzu gè ɓaaɠulamai zuzosu, ta unfegi lɔɔzu gàazu. 
Gè ɠɛa ga wɛɛn kɛ̀ɛleaiti gaazu, gè ɠɛ ga nui é la ɠwɛɛni pɛlɛyeɠei wu. 
Mazɔlɔɔ ɗa-ʋɛlɛi ma wɔinlai ɠa gàlazu eɠɛ abui. È ʋoomu nuiti ta-ʋoomugiti ti zeelia mà. 
Gè wɔlɔni ga zìimaʋɛ pɛ, gè zugi zo, naa ɠɛa zèa ga ɓaaɠulamai. 
Gè saa wɔlɔ wo seɠei loa ɠɔba, gè ɠɛa tiya ga ɲɛɛɠulasu anii. 
Ta zeizu kpɔgi zu, ti ɗa sùɠula, dɔɔ ɓɔle nuiti ti ɗa dàalɔɔ guyei zu. 
Kɛlɛ nɔ̀un nà, nà nà-maanɛɛnɛ wooi laazeelizu è ma, ee, Ɠɔoɠɔ GALAGI! É ɠɛ ga siɛgi nii soloogai, ee, GALA, gòoɠaaʋote ɗa-wooɠɛɠilada wolai zu, è kìzo ɗa-wooɠɛɠiladai maaʋele ma! 
Ùnmɔɔ, è kùla palaʋalai zu, gè mina mɔ yei su ʋolu! Ùnmɔɔ, è kùla naati zea, niiti ti wɔ̀inzeɠezu, kùla pali ɓomaʋɛ! 
Ziɛ veinfeingi mina màaɓɔle, zeɠezaɠa ɓokulagi mina màalɔɔɠu! Kabayeɠei laa mina ɠulu mà! 
Gòoɠaaʋote, Ɠɔoɠɔ GALAGI, mazɔlɔɔ è ʋagɛ ɗa-wooɠɛɠiladai zu. Ɗa-maawɔinɠaa wolai zu, lati nɔ̀un ma. 
Mina ʋoluave bà, nà ga ɗa-wotiɠɛ zunui. Nà-kidaaʋiligi zu, gòoɠaaʋote fala! 
Maaɓuɠa bà, è ùnmɔɔ. Nɔ̀un fie, sìli nuiti maaʋele ma. 
È nà-ɓaaɠulamai ɠwɛɛ, ta nà-unfegi, ta nà-bɛlɛʋiligi, niiti ti wɔ̀inzeɠezu, ta loni è ɠakala. 
Ɓaaɠulamai ɠa zìi ɓɔlɔzu, gè la ziɛzu bu, kìtogɛ maawɔinɠai ʋa tètema, kɛlɛ nà-maaɓɔungi ɠɛa ga wafuun! Nà gaanɛɛnɛ nu ɠaiziɛzu, kɛlɛ gè la nu zɔlɔɔsu. 
Ta anivebɛi ʋuuzu nà-daamianigi zu, kpɔɔle wɔin a ɠɛna mà, ti dɔɔ ɓodai ve, è lo dà. 
Ta-laami maaɓɔgi ɠɛ ti ʋɛ ga balii, ti ɠɔɔ la, ti-zɔlɔɔ ganii ɠɛ ti ʋɛ ga balii! 
Ti-ɠaazuʋɛ ɓidi, ti mina wozaɠa, è ti-zaamaʋɛ ɓili eyɛsu ɠɔ. 
Ɗa-yiiɠulagi yei ti ma, ɗa-yiiɠaawana wolai ti mazɔlɔɔ. 
Ti-ʋuuzuʋɛ ɠoloɠolo, ti ʋala nuɓusɛiti ma ti-zeizuʋɛ. 
Mazɔlɔɔ ta ʋilɛsu naa ʋolu, nii ɗa ɓɔɠɔi è doɠaai na, ta naati ta-maanɔɠɔ vai zuɠulazu, niiti è ti maawanaai niina. 
Ta-vaaɠaaza golai ma ɠasɔi la ti unma, ti mina lɔɔzu zɔlɔɔ ɗa-lelebodai zu. 
Ti-laaseigi ɓale, é ɠula zɛnvu zɛʋɛi zu, ti-laaseigi mina zɛʋɛ ʋɔɔma ta telebo nuiti. 
Nɔ̀un, màanɔɠɔʋɛ, gè ɗa zoolɛ ga ɓɔɠɔ, ee, GALA, ɗa-ɠizo fai bùzeɠe! 
Nà GALA daaseigi mama ga guyei, nà bɔɔlɔ, nà ɠɛna maamusɛa, 
naa nɛɛʋɛ Ɠɔoɠɔ GALAGI ʋɛ, é leʋe nikɛ zinɛi ʋa, anɛɛ nikɛ zinɛ wolai nii minɛiti ti ba, ta polokagiti. 
Ɓɔɠɔmaayei nuiti ta naa ɠa, ti ɠoozunɛ. Ungo, wɔi wo GALA gaiziɛzu, zɛnvui ve wo ya. 
Mazɔlɔɔ Ɠɔoɠɔ GALAGI ɠa ɗa woilo bala nuiti gooi ma, wooɠɛɠila nuiti ti ga ná-nuiti, é la ɗa ga naati ta-vai ʋɛlɛʋɛlɛga, ni ta ɠɛna kasoi ɠa. 
Geeɠɔlɔgi ta zooi ti maamusɛ, ta kpoloɗɛi ta niiti kpein ti bu. 
Mazɔlɔɔ GALA ka ʋaazu é Siyɔn taai ɠizo, toɠa Zuda laa wolaiti to ʋolu. Ná-nuɓusɛiti ta zei ná, ná ɠɛ ga tɔnɔ, 
Ɠɔoɠɔ GALAGI ná-botiɠɛ nuiti ti-mavofodai ɠa ná zɔlɔɔ ga tɔnɔ, niiti nɛai ti ʋɛ, naati ta ná ɠɛ ga ti-zeizuʋɛ. 
