﻿Guyeiti.
66.
Guye loo ɠundiɠii nɔnɔi ʋe. Guyei. À wooɠula GALA ma ga koozunɛɛi, wo kpein, wɔi wo zeini eteai zu! 
À daaseigi ná-lɛbiyai maamusɛ! À lɛbiyai ve bɛ ga wa-maamusɛiti! 
À ɠɛ GALA ma: «Ɗa-ɠɛɛwotiiti maayikiʋɛ! Ɗa-zobogi nii ɓela ge la ba, naa maaʋele ma, è zili nuiti ta nɔkɔ è wu. 
Eteai pɛ ka nɔkɔ è wu, ti guyei loo è lɛbi vai ma, ga ti ɗa-lɛbiyai maamusɛ.» 
À ʋa wo GALA ná-kɛɛwotiiti pɛtɛ! Ti maayikiʋɛ niiti é ti ɠɛɛzu nuɓusɛiti saama. 
É kpoloɗɛi valiboni, é kɛ ga zou vɔɔi, ti ziɛ wolai ɓudɛni ɠɔɠɔa, kpaaɠɔ la maazu. Miná ɠa gi ɠoozunɛɛni ná ga tɔun maaʋele. 
Toɠa masadai ɠɛɛzu eyɛsu ɠɔ ná-zɛbɛi ʋɔ, gaazuʋɛ ɠa wɛlɛzu ziiti ma, kololala nuiti ti mina mɔ wuzeɠe pɛ. 
Nuɓusɛiti, à gá-ƓALAGI mama, à wooɠula ga maamusɛ vai! 
Gá vulua tɔun saalai zu, é gi makɛ, gi mina loo. 
Ee, GALA, è gi ʋoluɠulani! È gi ʋoluɠulani, eɠɛʋelei ta ɗa walii ʋoluɠula la. 
Gi ɠɛni è ya tumɔi zu, è ɗa ʋa ga giye, è kasɔ wuigi laani gi-ɓokpozuʋɛ, 
è zobogi veeni gi zili nui ʋɛ, é zei gi unda, gi leʋeni abui zu ta ziɛi, kɛlɛ è gi ɠulani ti zu, è kulagaanɛɛzui ve gi ya. 
Nà liizu ɗa-ʋɛlɛi wu ga gala zalaɠaiti, nà nà-minazeɠegiti daazeeli è ʋɛ, 
niiti dàkɔlɔgiti ti ti woni, dàaʋɛ boni nà-kidaaʋiligiti su. 
Nà gala zalaɠaiti kula è ʋɛ, ti wulɔai, baala sinɛ wolaiti ta ti ɠala luului. Nà nikɛ zinɛiti kula ga zalaɠai, é ɓɔ boliiti ba. 
À ʋa wo woilo, wɔiti kpein wo luazu GALA ba, nà naa wosu wo ma, nii é kɛa nɔ̀un bɛ. 
Gè wooɠulani ma, ná-maamusɛi ɠɛni dàaʋɛ nɛ̀gi ma. 
Ni gè ɠɛni faa ɲɔi makɛni zìimaʋɛ, Màliɠii la ɠɛni woiloga gòo ma. 
Kɛlɛ wɛlɛ, GALA ge woiloni gòoi ma, é woiloni nà-maanɛɛnɛ wooi ma. 
Mamagi ɠa GALA bɛ, mazɔlɔɔ é la ɠɛlɛni nà-maanɛɛnɛ wooi ʋa, é la ná-wooɠɛɠiladai maaɠoozani bà! 
