﻿Guyeiti.
65.
Guye loo ɠundiɠii nɔnɔi ʋe. Davide ná-guyei. Guyei. 
Gá-maaɠɛkpɔgi gi bosu maaɓɔungi zu, ɗɔun è letemazu, naa ɠa ga maamusɛi, gi feezu è ʋɛ, ee, GALA, Siyɔn taazuʋɛ. Gɔun, gá gá-minazeɠegiti daazeeli, nii gi kɛɛni è ʋɛ. 
Ɗɛi è maanɛɛnɛ wooi mɛnisu, nuiti kpein ta ʋa è ʋɔ. 
Kotoi ma ɠasɔi wuiʋɛ mà, gola wuiʋɛ, kɛlɛ ɗa gá-lɔ koloɠologi kpein gbazu, è ti zuvaayɛ. 
Undaanɛ nu ɠa ga naama nui, nii è yiimazeɠezu la, è maaɓuɠa ɓɔɠɔ ʋa, ga é yɛ è zei ʋɛlɛi ma ɠoizuʋɛti. Gá yiɠo ga ɗa-ʋɛlɛwuʋɛ ma undaanɛɛi, ta ɗa-ʋɛlɛi ná-ɲadedai. 
GALA gi Ɠizo Nui, ɗa-lelebodai zu, ɗa gi wooɠaaʋotesu ga laavɔɔ ɠɛɛwotiiti, ɗɛi è ga nuɓusɛiti kpein ta-ɠitogi zou ɓela ga, ziɛ zaama yooiti su, ti maaɠoozaai. 
É gizeiti togɛ kpaan ga ná-zɛbɛi, é ɓɔɠɔ maaɠiliʋɛ ga zobogi. 
Toɠa kpoloɗɛiti sulu gooiti gaaɓɛɛzu, ta ti-ma lakpatakpagiti tugi, ta nuɓusɛiti sɔngɔ wooiti. 
Niiti ti zeini zou ɓela ga, naati daavɔɔʋɛ, ti ɗa lua, ga ɗa-ʋoogiti kaa vai, ɗa folo ɠulazu ta folo liizu laavesu ga koozunɛ wooiti. 
Ɗa eteai zɛsɛbosu, è kɔ ga bɔɔlɔa, è sulaave ga kulanumai, GALA ná-laasamagi laavegɛ ga ziɛi. Ɗa moloi ɠɛʋele ɓɛtɛzu nuiti bɛ, zooi ɠɛʋele ɓɛtɛai ʋɔ. 
Ɗa ziɛi ʋuuzu ma ɓabiiti su ga bɔɔlɔa. È pɔlɔ ɓuiti golowolo, gaanɛmɛ, è zɛɓɛ ga tonaiti, è tuya loo pɔnɔ ganiiti ma. 
È konagi maaɠiliʋɛ ga ɗa-vaanɛɛiti, ʋɛ dɔin è leʋeni ná, zooi wulɔʋɛ ná pɛ. 
Anɛɛ dɔɓɔ zaama lufaiti ta ziɛi wola zɔlɔɔsu, gizeiti ti zaamaɠilia ga koozunɛɛi. 
Toganiiti ta ʋɛɛni tufa lɛnugi zu mɛɛ, molo lufai nɛmɛiti suɓidia, ti pɛ ta guyei loozu, ti ta-ɠoozunɛɛi ɠula kɛlɛma. 
