﻿Guyeiti.
64.
Guye loo ɠundiɠii nɔnɔi ʋe. Davide ná-guyei. 
Ee, GALA, woilo gòoi ma, siɛgi zu gè kpalagi wosu da! Zɛ̀nvui makɛ sìli nuiti daalɔɠɔma, gè luazu ti ʋa! 
Kìzo nu ɲɔiti daayaavai ma, ta naati ta-woya vaiti ma, niiti ti faa ɲɔi ɠɛɛzu. 
Ta ti-nɛgi ɠaalizu eɠɛ boɠa zɔkpɔi, ta nu maawana ɓɔɛiti bosu, eɠɛ mɛɛinti ti ʋilisu, 
é ʋilisu dɔɔɠuzu telebo nui ma. Ta pilisu ma ga kulafilibai, inɛinɛ ge la ti ʋa. 
Ta ɓɔɠɔ zasulɔɔzu kpɔɛ ɲɔu wogaiti su, ta bosu ga ti baliiti da, ti maalɔɔɠu, ti ɗa ɠɛ ma: «Ɓɛ ɠa a ti ɠa?» 
Ti ɗa yaavaiti kpɛtɛ, ti ɠɛ ma: «Wɛlɛ, ade ɠɛʋele ɓɛtɛa, ada-vaa ɓɛtɛi zolooga su!» Ungo, kigaiziɛi, nu zii ɠa ga zeɠezaɠai. 
Kɛlɛ GALA ka mɛɛin ʋilisu ti ma ga kulafilibai, tiya ɠana ti zuloɠaai. 
Ti-nɛgi ɠa é ti ɓunɛgai. Nuiti ta ti ʋɛtɛna, ti ɗa ɠɔmɔɔni ga tiye. 
Dualuagi nuɓusɛiti kpein sogɛ, ta GALA ná-kɛɛwotii ɠulazu kɛlɛma, ti ná-kɛɛwotiiti gaaɠa. 
Telebo nui ɠa ɠoozunɛɛzu Ɠɔoɠɔ GALAGI ná-fai zu, é lɔɔɠu pɔ bɛ. Niiti dɔin ti-yii zɔlegai, naati ta ɓɔɠɔ maamusɛ. 
